Pune Police – वाहतुकीच्या नियमांचे उल्लंघन करणाऱ्यांवर वचक बसवण्यासाठी पुणे पोलिसांनी विकसित केलेले ‘पीटीपी’ ॲप आता प्रभावी शस्त्र ठरू लागले आहे. या ॲपच्या माध्यमातून आतापर्यंत १ लाख ३० हजार नागरिकांना नियम उल्लंघनाबद्दल चलन बजावल्याची माहिती अतिरिक्त पोलीस आयुक्त मनोज पाटील यांनी दिली. उच्च व तंत्रशिक्षण विभाग, मॉडर्न महाविद्यालय, मुस्कान फाउंडेशनतर्फे आयोजित रस्ते सुरक्षा कार्यशाळेत पाटील बोलत होते. उच्च शिक्षण संचालक डॉ. शैलेंद्र देवळाणकर, कुलगुरू डॉ. सुरेश गोसावी, प्रोग्रेसिव्ह एज्युकेशन सोसायटीचे कार्याध्यक्ष डॉ. गजानन एकबोटे, कार्यवाह डॉ. शामकांत देशमुख, सहकार्यवाह डॉ. ज्योत्स्ना एकबोटे, प्राचार्य डॉ. निवेदिता एकबोटे, उच्च शिक्षण सहसंचालक डॉ. अर्चना बोऱ्हाडे, ज्येष्ठ पत्रकार श्रीधर लोणी, मुस्कान फाऊंडेशनच्या नेहा खुल्लर, पुनीत सबरवाल या वेळी उपस्थित होते. पाटील म्हणाले, सुरुवातीला ॲपवर महिन्याला ३६०० तक्रारी येत होत्या. आता हे प्रमाण दिवसाला २४०० तक्रारींपर्यंत पोहोचले आहे. आतापर्यंत १ लाख ८० हजार तक्रारी प्राप्त झाल्या असून, त्यापैकी १ लाख ३० हजार तक्रारींवर कारवाई केली आहे. ॲपमुळे नागरिकांमध्ये अदृश्य भीती निर्माण झाली असून, प्रत्येक नागरिक पोलिसाची भूमिका बजावत आहे. दरम्यान, दरवर्षी सरासरी १ लाख ८० हजार लोकांचा अपघातात मृत्यू होतो, ज्यात २० ते ४० वयोगटातील तरुणांचे प्रमाण लक्षणीय आहे. पुण्यात २०२३ मध्ये ८ ते ९ लाख चलन काढण्यात आले होते, तर २०२४ मध्ये हे प्रमाण २२ लाखांपर्यंत गेले आहे. दंडात्मक कारवाई वाढल्याने अपघाती मृत्यूंचे प्रमाण २७० वरून २२३ पर्यंत कमी झाले. कॉलेजमध्ये हेल्मेट सक्ती शैक्षणिक संकुलात वाहने घेऊन येणाऱ्यांना हेल्मेटची सक्ती केल्यास,प्रवास सुरक्षित होईल. विद्यार्थी, कर्मचाऱ्यांनी हेल्मेट वापरण्यासाठी शिक्षण संस्थांची मदत हवी. नियमानुसार शिक्षण संस्थेत वाहन आणण्यासाठी विद्यार्थ्यांना हेल्मेटचा वापर अनिवार्य करावा, असेही पाटील यांनी सांगितले.
