वाघोली(प्रतिनिधी) : पुणे पोलीस आयुक्त अमितेश कुमार यांच्या आदेशाने लोणीकंद पोलीस ठाण्याच्या अंतर्गत घडलेल्या हिट अँड रन या प्रकरणाची चौकशी सहाय्यक पोलीस आयुक्त विठ्ठल दबडे यांनी सुरू केली आहे. दैनिक प्रभात दि.१८ रोजी वृत्त प्रसिद्ध करून या प्रकरणाला वाचा फोडली होती. याची दखल पुण्याचे पोलीस आयुक्त अमितेश कुमार यांनी घेतली असून या प्रकरणाची सखोल चौकशी करण्याचे आदेश सहायक पोलीस आयुक्तांना दिले होते. त्यानुसार सहाय्यक पोलीस आयुक्तांनी लोणीकंद पोलीस ठाण्याला भेट देत या प्रकरणाशी निगडित असणाऱ्या पोलीस व नागरिकांची चौकशी सुरू केली आहे. सहाय्यक पोलीस आयुक्तांनी या प्रकरणातील दोषींवर कडक कारवाई करण्याचे आश्वासन अपघातग्रस्तांच्या नातेवाईकांना दिले असल्याचे नातेवाईकांनी सांगितले आहे. केसनंद येथील तीन युवकांना गंभीर दुखापत करणाऱ्या आरोपींवर पोलिसांनी कडक कारवाई करावी व या प्रकरणातील दोषींवर कारवाई करावी अशी मागणी ग्रामस्थांकडून केली जात आहे. लोणीकंद पोलिसांचे वर्तन सुधारण्याची गरज.. अपघात ग्रस्त व्यक्तींच्या नातेवाईकांना आलेल्या अनुभवाची कैफियत वरिष्ठ पोलीस अधिकाऱ्यांसमोर नागरिकांनी मांडली आहे. यातून लोणीकंद पोलीस ठाण्यात कर्मचाऱ्यांकडून सर्वसामान्य नागरिकांना दिलेल्या वागणुकीबाबत प्रश्नचिन्ह उभे राहत असून वरिष्ठ अधिकाऱ्यांकडून या प्रकरणाची दखल घेऊन पोलिसांचे वर्तन सुधारण्याची गरज निर्माण झाली आहे.
