पिंपरी चिंचवड : आज सगळीकडे वटपौर्णिमा साजरी केली जात आहे. यादरम्यान पिंपरी चिंचवडमधून एक धक्कादायक घटना समोर आली आहे. यामध्ये एका विवाहित महिलेचं भरदिवसा अपहरण करण्यात आलं. ऑफिसमधून गाडीपर्यंत तिला फरफटत नेण्यात आलं. दोन दिवस तिला वारंवार भुलीचं इंजेक्शन देत, गाडीतचं डांबून ठेवण्यात आलं. यानंतर या महिलेने कशीबशी आपली सुटका करून वाकड पोलीस ठाण्यात धाव घेतली. धक्कादायक म्हणजे हा संतापजनक प्रकार तिच्या पतीनेच केला आहे. सुमित शहाणे असे आरोपी पतीचं नाव आहे. काय घडले नेमके? पुण्याच्या मंचरमधील हे दाम्पत्य असून ऑगस्ट 2023 मध्ये या दोघांचं लग्न झालं. मात्र आठवडाभरात पती सुमितने नको त्या मागण्या सुरू केल्या, ज्या पत्नीला पचनी पडल्या नाहीत. मग ती पती सुमितपासून लांब राहू लागली. तिने थेट मुंबई गाठली, तिथं काही महिने ती मैत्रिणीकडे राहिली. त्यानंतर काही दिवसांपूर्वी ती नोकरीसाठी पिंपरी चिंचवडमध्ये आली. इथं एका बांधकाम व्यवसायिकाकडे काम सुरू केलं. याची माहिती सुमितला मिळताच त्याने तिच्या ऑफिसचा पत्ता शोधून काढला. यानंतर 19 जूनला सुमित आई आणि चालकासोबत वाकडमध्ये आला. दुपारी साडे तीनच्या सुमारास पत्नीला फरपटत गाडीत बसवलं. त्यावेळी पत्नीचा मित्र ही जबरदस्तीने गाडीत बसला. गाडी मंचरच्या दिशेने निघाली, थोडं पुढं गेल्यावर सुमितने पत्नीच्या मित्राला कानशिलात लगावली आणि गाडीतून बाहेर ढकलून दिलं. तिथून पुढचा प्रवास सुरु झाला. त्या प्रवासात सुमितने पत्नीला भुलीच इंजेक्शन दिलं. थेट घरी न जाता गाडीतच डांबून ठेवलं. या दरम्यान ती शुद्धीवर आली की तो वारंवार भुलीच इंजेक्शन द्यायचा, असा आरोप पीडित महिलेने केला आहे. कशी झाली सुटका? 20 जूनच्या दुपारी पीडित महिलेने सुमितला विश्वासात घेतलं, तो सांगतोय त्या कागदपत्रांवर सही करते, असं ती म्हणाली. मग सुमितने गाडी मंचर परिसरात आणली, मात्र माझी भूल अद्याप उतरली नाही, असा बहाणा तिने केला, मग ते मंदिरात थांबून राहिले. त्यावेळी पत्नीने एका तरुणास खुनवत, मदतीची मागणी केली. त्या तरुणाला ही काहीतरी गडबड असल्याचं समजलं, मग तिथं मंचर पोलिसांना बोलवण्यात आलं. पोलीस मंदिरात पोहचले अन पत्नीची सुमितच्या तावडीतून सुटका झाली. वाकड पोलीस ठाण्यात तक्रार दाखल करण्याचे काम सुरु आहे. तसेच पीडित महिलेचे अपहरण ते सुटका यादरम्यान काय काय घडले याचा तपासदेखील पोलिसांकडून करण्यात येणार आहे.
