प्रभात वृत्तसेवा पुणे – प्रभाग रचनेचे नियम धाब्यावर बसवून चुकीच्या पद्धतीने प्रभाग रचना करण्यात आली आहे. त्यातही, प्रभाग रचना करणारेच सुनावणी घेणार असतील तर सुनावणीचा घाट कशाला? थेट भाजपच्या १६५ नगरसेवकांची यादीच जाहीर करा, अशा शब्दांत माजी नगरसेवक, राजकीय कार्यकर्ते आणि इच्छूकांनी महापालिकेच्या प्रारूप प्रभाग रचनेवरील सुनावणीवेळी नाराजी व्यक्त केली. प्रभाग रचना करताना एससी आरक्षण आपल्या प्रभागात येऊ नये म्हणून भाजप पदाधिकाऱ्यांकडूनच मोडतोड करण्यात आल्याचा आरोप हरकतदारांकडून करण्यात आला. त्यामुळे सुनावणीदरम्यान काही काळ गोंधळाची स्थिती निर्माण झाली. मात्र, मोठा पोलीस बंदोबस्त असल्याने हा गोंधळ लवकरच निवळला.महापालिकेच्या प्रारूप प्रभाग रचनेवरील हरकती आणि सूचनांची सुनावणी गरूवारी सकाळपासून बालगंधर्व रंगमंदिरात सुरू झाली. पहिल्या दिवशी प्रभाग क्रमांक १ ते २९ मधील हरकतींवर सुनावणी घेण्यात आली. त्यासाठी हरकती दाखल केलेल्या २९२२ जणांना बोलावण्यात आले होते. मात्र, केवळ ५४० जण उपस्थित राहिले. सुनावणीदरम्यान एका प्रभागाच्या हरकतींसाठी एकत्र चर्चा घेत चार ते पाच जणांनाच बोलू दिले जात होते, त्यामुळे अनेकांनी नाराजी व्यक्त केली. विशेषत: प्रभाग क्रमांक १४ जयजवाननगर–पुणे स्टेशन आणि प्रभाग क्रमांक २४ कमला नेहरू हॉस्पिटल–रास्तापेठ यांच्या सुनावणीवेळी सर्वाधिक गोंधळ झाला. या सुनावणीसाठी निवडणूक आयोगाने नेमलेले प्राधिकृत अधिकारी व्ही. राधा यांनी हरकती ऐकून घेतल्या. महापालिका आयुक्त नवल किशोर राम, अतिरिक्त आयुक्त ओमप्रकाश दिवटे आणि निवडणूक विभाग प्रमुख प्रसाद काटकर उपस्थित होते. मग त्यात बदल कसे होणार? प्रभाग क्रमांक १४ जयजवाननगर पुणे स्टेशनची रचना करताना कोणतेही निकष पाळले नाहीत तसेच चुकीच्या पद्धतीने रचना केली, अशी हरकत शिवसेनेचे (ठाकरे गट) संजय भोसले यांनी घेतली. ते बोलताना जोरात आवाज चढवत नाराजी व्यक्त करीत होते. त्यावेळी व्ही. राधा आणि आयुक्तांनी त्यांना आवाज चढवू नका, असे सांगितले. त्यामुळे संतापलेल्या भोसले यांनी, आम्ही काय बोलतो ते सगळ्यांनी ऐकले पाहिजे, असे म्हणत आणखीच जोरात बोलण्यास सुरूवात केली. प्रभाग रचना तुम्ही करता, सुनावणी तुम्हीच घेता…, मग त्यात बदल कसे होणार? या सुनावणीला काहीच अर्थ नाही. आम्ही उगाच टाईमपास करायला आलोय का? त्या ऐवजी तुम्ही थेट भाजपच्या १६५ नगरसेवकांची यादी जाहीर करा, अशी भूमिका मांडल्याचे त्यांनी सांगितले. २५ वर्षांचे आरक्षण उठले कसे? प्रभाग क्रमांक २४ कमला नेहरू हॉस्पिटल–रास्तापेठ या भागात अनुसूचित जातींसाठी (एससी) आरक्षण गेली २५ वर्षे होते. मात्र, यावेळी ते शेजारच्या प्रभागात कसे गेले, अशी हरकत माजी नगरसेवक लक्ष्मण आरडे आणि माजी नगरसेविका पल्लवी जावळे यांनी घेतली. प्रभाग रचना करताना एससी लोकसंख्या इतर प्रभागात दाखवली गेल्याने आरक्षणही दुसरीकडे गेले आहे. मतदारांसाठी तो प्रभाग सोयीचा राहणार नाही. हा अन्याय आहे, असे सांगत हरकतदारांनी सुनावनीदरम्यानच डाॅ. बाबासाहेब आंबेडकरांचा विजय असो, अशी घोषणाबाजी केली. यावेळी महापालिका आयुक्त उपस्थित नसल्याने अचानक झालेल्या घोषणाबाजीने गोंधळ निर्माण झाला. मात्र, सुरक्षारक्षक आणि पोलिसांनी तत्काळ मध्यस्थी करून स्थिती नियंत्रणात आणली. आपला कसबा कुठंय? कसबा हा पारंपरिक प्रभाग आहे. यापूर्वी झालेल्या निवडणुकांमध्ये कसब्याचे अस्तित्व कायम होते. मात्र, यंदा नैसर्गिक नियमांचे उल्लंघन करून कसबा प्रभागाची मोडतोड करण्यात आली. यामागे राजकीय षड्यंत्र आहे. राजकीय द्वेषभावनेतून ही मोडतोड करण्यात आली आहे, अशा भावना व्यक्त करत प्रणव रविंद्र धंगेकर यांनी आपला कसबा कुठंय? असा फलक झळकावून नाराजी व्यक्त केली. कसबा विधानसभा मतदारसंघातील एकाही प्रभागाला कसबा, हे नाव देण्यात आलेले नसल्याचे त्यांनी निदर्शनास आणून दिले. “महापालिका निवडणुकीचा अविभाज्य भाग असलेल्या प्रक्रियेतील प्रभाग रचना, हरकती, सुनावणी मी आजपर्यंत पाच पाहिल्या आहेत. मात्र, कोणत्याही सुनावणीवेळी अशा प्रकारे पोलीस बंदोबस्त ठेवण्यात आलेला नव्हता. प्रभागांची मोडतोड केल्यानेच अधिकारी धस्तावले आहेत. त्यामुळेच मोठ्या बंदोबस्तात ही सुनावणी घेतली आहे.” – प्रशांत जगताप, राष्ट्रवादी काँग्रेस (शरद पवार पक्ष)
