प्रभात वृत्तसेवा पुणे – राज्य शासनाच्या अल्पसंख्याक विभागातर्फे दिल्या जाणाऱ्या परदेशी शिक्षण शिष्यवृत्तीसाठी निवड झालेल्या विद्यार्थ्यांची संख्या तिपटीने वाढली आहे. यंदा शिष्यवृत्तीसाठी ७५ विद्यार्थ्यांची निवड करण्यात आली असून, गेल्या वर्षी ही संख्या २४ होती. या शिष्यवृत्तीसाठी विद्यार्थ्यांना हमीपत्र देणे बंधनकारक असून, विद्यार्थ्यांनी त्यांचा अभ्यासक्रम वेळेत पूर्ण करणे आवश्यक आहे. अल्पसंख्याक समुदायातील विद्यार्थ्यांना आर्थिक परिस्थितीमुळे उच्च शिक्षणासाठी परदेशातील विद्यापीठांमध्ये प्रवेश घेता येत नाही. गुणवत्ता असूनही विद्यार्थ्यांना आर्थिक परिस्थितीमुळे शिक्षणापासून वंचित राहावे लागते. त्यामुळे अल्पसंख्याक समुदायातील विद्यार्थ्यांना परदेशात शिक्षणाची संधी मिळावी, यासाठी परदेश शिष्यवृत्ती योजना २०२४-२५ पासून लागू करण्यात आली. त्यानुसार अल्पसंख्याक विद्यार्थ्यांना पदव्युत्तर, पीएच.डी. अभ्यासक्रमासाठी क्यूएस क्रमवारीतील पहिल्या 200 विद्यापीठांमध्ये प्रवेश घ्यावा लागतो. या पार्श्वभूमीवर शैक्षणिक वर्ष २०२५-२६मध्ये शिष्यवृत्तीसाठी पात्र ठरलेल्या विद्यार्थ्यांची यादी जाहीर करण्यात आली.यंदा या शिष्यवृत्तीसाठी एकूण १४८ विद्यार्थ्यांनी अर्ज केला होता. त्यापैकी १०९ विद्यार्थ्यांचे अर्ज निकषांनुसार पात्र ठरले. त्यातून निवड समितीने ७५ विद्यार्थ्यांची शिष्यवृत्तीसाठी निवड केली आहे. त्यात ६७ विद्यार्थी पदव्युत्तर पदवी, ७ विद्यार्थी पीएच.डी. अभ्यासक्रमाचे आहेत, तर उर्वरित ३४ विद्यार्थ्यांची प्रतीक्षा यादी तयार करण्यात आली आहे. शिष्यवृत्तीसाठी निवड झालेले विद्यार्थी ऑस्ट्रेलिया, ब्रिटन, नेदरलँड, अमेरिका, न्यूझीलंड, दक्षिण कोरिया, इटली अशा देशांतील विद्यापीठांमध्ये पदव्युत्तर, पीएच.डी. अभ्यासक्रमांसाठी जाणार आहेत.
