Pune News : आजारी कुत्र्यांबाबत आम्ही आधीपासूनच सर्वोच्च न्यायालयाने दिलेल्या निर्देशांचे पालन करत आहोत. त्या दृष्टीने उपाययोजनाही सुरू केल्या आहेत, रेबीज झालेल्या संशयित कुत्र्याची या वर्षांत एकही नोंद नाही, अशी माहिती महापालिकेतील सहाय्यक आरोग्य अधिकारी (पशुवैद्यकीय विभाग) डॉ. सारिका भोसले-फुंडे यांनी दिली. असाध्य, आजारी आणि पिसाळलेल्या (रेबीज) कुत्र्यांना ठार मारण्यासाठी इंजेक्शन पर्यायाचा विचार करावा, या सर्वोच्च न्यायालयाने दिलेल्या निर्देशांच्या पार्श्वभूमीवर महापालिकेकडून केल्या जाणाऱ्या उपाययोजनांची माहिती डॉ. फुंडे यांनी दिली. महापालिकेने शाळा, महाविद्यालये, मैदाने आणि अन्य सार्वजनिक ठिकाणी फिरणाऱ्या कुत्र्यांची माहिती गोळा केली आहे. या विषयावर विद्यार्थी, शाळा आणि शिक्षकांमध्येही जागृती निर्माण केली जात आहे. या कुत्र्यांच्या लसीकरणासाठी आणि त्यांच्या स्थानबद्धतेसाठी शेल्टरही बांधण्यात आले आहेत, तेथे त्यांचे लसीकरणही केले जाते. पकडलेल्या कुत्र्यांचे वय, वजन पाहता नसबंदीवर काही अंशी मर्यादा येतात, असेही डॉ. फुंडे यांनी नमूद केले. शहरातील कुत्र्यांची गणना २०२३ मध्ये झाली होती, त्यावेळी ती संख्या एक लाख ८० हजारांच्या आसपास होती. मात्र, समाविष्ट गावांचा विचार करता ही संख्या अडीच लाखांपेक्षाही अधिक असावी, आता महापालिका पुन्हा श्वानांची गणना करायला सुरूवात करणार आहे. नसबंदी, लसीकरण या सगळ्या उपाययोजनांवर भर दिला जात असून, या वर्षांत शहरात एकाही कुत्र्याचा रेबिजने मृत्यू झाल्याची नोंद झालेली नाही. मात्र, जानेवारी, एप्रिल या महिन्यात रेबीजने आजारी असलेली दोन कुत्रे सापडल्याचे, त्या कुत्र्यांचा मृत्यू झाल्याचे, डॉ. फुंडे यांनी सांगितले. ग्रामीण भागातून शहरात… ग्रामीण भागातून शहरात रेबीज झालेले रुग्ण उपचारासाठी येण्याचे प्रमाण मोठे आहे. २०२५ मध्ये शहरात रेबीजने एकही मृत्यूची नोंद नसली तरी बाहेरून शहरात उपचारासाठी आलेल्यांतील १० जणांचा रेबीजने मृत्यू झाल्याची नोंद महापालिकेकडे आहे. पुणे शहराच्या आजूबाजूच्या परिसरातून अनेकजण कुत्रा चावल्यानंतर उपचारासाठी येतात. मात्र, उपचार घेण्याला विलंब केल्याने त्या रुग्णांत रेबीजची लक्षणे निर्माण होतात, अशावेळी अशा रुग्णांना वाचवणे शक्य होत नाही.
