Pune News: पुणे महानगर प्रदेश विकास प्राधिकरणाच्या (पीएमआरडीए) हद्दीत आता विकास आराखड्याऐवजी (डीपी) स्ट्रक्चर प्लॅन तयार करण्याचा निर्णय घेतला आहे. याबाबतचे आदेश नगर विकास विभागाने जारी केले आहेत. त्यानुसार आता प्राधिकरणाच्या हद्दीत रस्त्यांचे जाळे आणि पायाभूत सुविधा उभारण्याचा आराखडा तयार करण्यात येणार आहे. या स्ट्रक्चर प्लॅनचे प्रारूप जाहीर करण्यासाठी शासनाने प्राधिकरणाला सहा महिन्यांची मुदत दिली आहे. स्ट्रक्चर प्लॅन सहा महिन्यांत तयार करण्याचे बंधन प्राधिकरणाच्या हद्दीतील ८१४ गावांचा नियोजनबद्ध विकास करण्यासाठी प्राधिकरणाने २०१७ मध्ये विकास आराखड्याचा इरादा जाहीर केला होता. त्यानंतर २ ऑगस्ट २०२१ मध्ये प्रारूप विकास आराखडा तयार करून जाहीर केला. त्यावर नागरिकांकडून हरकती सूचना मागविण्यात आल्या. सुमारे ६७ हजार नागरिकांनी हरकती दाखल केल्या. सुनावणीची प्रक्रिया करून बदलासह आराखडा प्रसिद्ध करण्यास पीएमआरडीएने मे २०२४ मध्ये राज्य सरकारकडे मान्यतेसाठी सादर केला होता. परंतु न्यायालयीन वादामुळे आराखडा मंजुरीचे काम थांबले होते. दरम्यान, हा आराखडा रद्द करण्याचा निर्णय राज्य सरकारने घेतला. त्यानुसार प्रतिज्ञापत्र प्राधिकरणाकडून न्यायालयास सादर करण्यात आले. न्यायालयाने देखील त्यास मान्यता दिली. त्यानंतर प्राधिकरणाने प्रारूप विकास आराखडा रद्द केला. त्यानंतर प्राधिकरणाने हद्दीचा विकास आराखडा तयार करण्याआधी स्ट्रक्चर प्लॅन तयार करण्यास परवानगी देण्याची मागणी शासनाकडे केली. त्यास मंगळवारी नगर विकास विभागाने मान्यता दिली. याबाबतचे आदेश नगर विकास विभागाचे उपसचिव प्रणव कर्पे यांनी जारी केले आहेत. पायाभूत सुविधांचा आराखडा प्राधिकरणाच्या स्ट्रक्चर प्लॅनमध्ये पहिल्या टप्प्यात रस्त्यांचे जाळे आखण्यात येणार आहे. त्यानंतर सांडपाणी प्रक्रिया प्रकल्प, जलशुद्धीकरण प्रकल्प, टाऊन हॉल अशा मूलभूत पायाभूत सुविधांचा आराखडा तयार करण्यात येणार आहे. घनकचरा, रस्त्यांसोबत पायाभूत सुविधांचे जाळे तयार होणार या बाबींचा होणार विचार शहरांतर्गत आणि आंतर-शहर जोडणी देणारे मुख्य परिवहन मार्ग, पोहोच रस्त्यांची पुरेशी रुंदी आणि प्रादेशिक स्तरावरील वाहतूक नियोजन, प्रादेशिक स्तरावरील नागरी सुखसोयी, उद्याने आणि सेवा आणि जैवविविधता उद्यान आणि हिल-टॉप, हिल स्लोप झोनचे संरक्षण आदी बार्बीस अनुसरून स्ट्रक्चर प्लॅन तयार करण्याच्या सूचना नगर विकास विभागाने दिल्या आहेत. हेही वाचा: Pune News : २.५ TMC पाणी वाचणार! खडकवासला बोगद्याचं काम सुसाट; ‘बुमर’ मशिनचा धडाका सुरू
