Pune News : इंद्रायणी ब्रँडने खाद्यतेल विक्री करणाऱ्या तरुण उद्योजकाला “१० लाख रुपये द्या, नाहीतर कंपनीची बदनामी करून बंद पाडू” अशी धमकी देत खंडणी मागितल्याचा धक्कादायक प्रकार उघडकीस आला आहे. याप्रकरणी एका न्यूज चॅनेलच्या संपादकासह दोघांविरुध्द खंडणीचा गुन्हा दाखल मांजरी पोलीस ठाण्यात दाखल करण्यात आला आहे. मांजरी पोलिसांनी सांगितले की, फिर्यादी हर्षल संदीप धोक्रट (२४ रा. आंबेगाव बुद्रुक) हे फ्रीझल फुडस प्रा. लि. या कंपनीचे संचालक आहेत. त्यांच्या कंपनीमार्फत ‘इंद्रायणी’ या नावाने खाद्यतेलाचे पॅकेजिंग व विक्री केली जाते. कंपनीचे गोदाम हांडेवाडी रोड, उरळी देवाची येथे आहे. २५ फेब्रुवारी रोजी रात्री तीन व्यक्ती गोदामात आल्या. त्यापैकी एकाने स्वतःला पोलिस कॉन्स्टेबल ननवरे असे सांगितले, तर सोबत आलेल्यांनी स्वतःला पत्रकार असल्याचे सांगून कंपनीत व्हिडिओ शूटिंग सुरू केले. कंपनी अस्वच्छ असल्याचा आरोप करत त्यांनी मालकाला पोलीस ठाण्यात येण्यास सांगितले. यानंतर संबंधित पत्रकारांनी कंपनीची नकारात्मक बातमी पेपर, न्यूज चॅनल व सोशल मीडियावर प्रसारित करण्याची धमकी दिली. “प्रकरण मिटवायचे असेल तर १० लाख रुपये द्या,” अशी मागणी केल्याचा आरोप आहे. कात्रज-कोंढवा रोडवरील कान्हा हॉटेलमध्ये झालेल्या भेटीत सागर हांगे व महाराष्ट्र न्यूज मराठी चॅनेलचे संपादक सागर गवळी यांनी मोबाईलवरील कॅलक्युलेटरमध्ये दहा लाख ही रक्कम दाखवून पैशांची मागणी केल्याचे तक्रारीत नमूद आहे. त्यानंतर वारंवार मोबाईल कॉल व व्हॉट्सॲप कॉल करून पैसे देण्याचा दबाव टाकण्यात आल्याचा दावा आहे. बातमी लागली तर कंपनीची बदनामी होईल,” अशी धमकी देण्यात आल्याचे सांगितले आहे. या प्रकारामुळे घाबरलेल्या व्यावसायिकाने अखेर पोलिसांकडे तक्रार दाखल केली. प्रकरणाचा तपास फुरसुंगी पोलीस स्टेशन कडून सुरू आहे. संबंधित मोबाईल क्रमांकावरील कॉल रेकॉर्डिंग व सीसीटीव्ही फुटेजची तपासणी केली जात आहे.
