प्रभात वृत्तसेवा पुणे – जांभूळवाडी तलावात मित्रांसोबत पोहण्यासाठी गेलेल्या १३ वर्षीय मुलाचा पाण्यात बुडून मृत्यू झाल्याची दुर्दैवी घटना बुधवारी दुपारी घडली. अग्निशमन दलाच्या जवानांनी शोध घेऊन त्याचा मृतदेह बाहेर काढला. याप्रकरणी आंबेगाव पोलीस ठाण्यात आकस्मात मृत्यूची नोंद करण्यात आली आहे.बादल शब्बीर शेख (वय १३, रा. सच्चाईमाता मंदिर, कात्रज) असे मृत मुलाचे नाव आहे. पोलिसांच्या माहितीनुसार, बादल आपल्या मोठ्या भावासह काही मित्रांसोबत तलावात पोहण्यासाठी गेला होता. मात्र, त्यांना पोहता येत नव्हते. सर्व जण पाण्यात उतरले असता, बादल अचानक खोल पाण्यात गेला आणि बुडाला. हे पाहून इतर मित्रांनी आरडाओरडा केला. बादलच्या भावाने तत्काळ वडिलांना फोनवर माहिती दिली. त्यांनी घटनास्थळी धाव घेत पोलिसांना कळविले. दरम्यान, अग्निशमन दलाच्या जवानांनी तातडीने शोधमोहीम राबवून बादलला काही वेळानंतर बाहेर काढले. मात्र, तोपर्यंत त्याचा श्वासोच्छवास बंद झाला होता. रुग्णालयात नेल्यानंतर डॉक्टरांनी त्याला मृत घोषित केले. बादलचे वडील रिक्षाचालक असून, तो स्थानिक शाळेत शिकत होता. अल्पवयातच त्याचा झालेला मृत्यू दुर्दैवी ठरला असून, परिसरात हळहळ व्यक्त केली जात आहे. नदीपात्रात महिला पडली? डेक्कन भागातील नदीपात्रात लकडी पुलानजीक सायंकाळी सहाच्या सुमारास एक महिला पाण्यात पडल्याची अग्निशमन दलास माहिती मिळाली. त्यानुसार दलाची दोन वाहने घटनास्थळी दाखल झाली. रात्री उशिरापर्यंत महिलेचा शोध घेण्यात येत होता.
