Pune Nashik Highway – पुणे-नाशिक राष्ट्रीय महामार्गावरील चाकण ते भोसरी आणि लगतच्या परिसरात अपघातांचे प्रमाण चिंताजनकरीत्या वाढले आहे. पिंपरी-चिंचवड वाहतूक विभागाच्या माहितीनुसार, चाकण औद्योगिक पट्टा तसेच मोशी-भोसरी मार्गावर गेल्या वर्षभरात 125 हून अधिक नागरिकांचा अपघातात मृत्यू झाला आहे. मोशी जुना टोलनाका ते चाकण चौक दरम्यान अवजड वाहनांची मोठी वर्दळ असल्याने सतत वाहतूक कोंडी निर्माण होत आहे. कोंडीतून बाहेर पडताच वाहनांचा वेग वाढत असल्याने अपघात घडत आहेत. आळंदी फाटा ते चाकण दरम्यान अनेक ठिकाणी सिग्नल यंत्रणा बंद असून वाहतूक पोलिसांची कमतरताही जाणवत आहे. एनएचएआयकडून सुरू असलेल्या काँक्रिटीकरणाच्या कामांमुळे रस्ते अरुंद झाले आहेत. अतिक्रमणे आणि अवजड वाहनांमुळे वाहतूक विस्कळीत होत असून अपघातांना आमंत्रण मिळत आहे. रात्री चालकांना येणारी डुलकी, निष्काळजीपणे ओव्हरटेक करणे आणि समोरासमोर धडक होण्याच्या घटनाही वाढल्या आहेत. मिसिंग लिंकची प्रतीक्षा दरम्यान, वाढती वाहतूक कोंडी आणि अपघात रोखण्यासाठी राज्य शासनाने पुणे-नाशिक महामार्गावरील चाकण, तळेगाव चौक, आंबेठाण चौक आणि आळंदी फाटा येथे 261 कोटी रुपये खर्चून चार ‘मिसिंग लिंक’ उभारण्याचा निर्णय घेतला आहे. या उन्नत मार्गांमुळे भविष्यात अवजड वाहतूक शहराबाहेरून वळविणे शक्य होऊन अपघातांचे प्रमाण कमी होण्याची अपेक्षा व्यक्त केली जात आहे.
