Pune-Nanded Express: मराठवाडा रेल्वे प्रवासी महासंघ यांच्या वतीने २७ फेब्रुवारी रोजी रेल्वे प्रशासनाशी विविध प्रलंबित प्रश्नांवर चर्चा करण्यात आली. दक्षिण मध्य रेल्वे विभागाचे नवनियुक्त अतिरिक्त महाप्रबंधक C. H. कल्याण राजू यांची भेट घेऊन त्यांचे स्वागत करण्यात आले. या वेळी मुख्य परिचालन प्रबंधक कुमार गौरव तसेच अतिरिक्त परिचालन प्रबंधक श्रीनिवास सूर्यवंशी उपस्थित होते. महासंघाने दिलेल्या निवेदनात नांदेड–हडपसर दैनंदिन रेल्वे पूर्ववत पुणे किंवा खडकीपर्यंत चालवावी, अशी प्रमुख मागणी करण्यात आली. तसेच पनवेल मार्गे नांदेड–रत्नागिरी, परभणी मार्गे छत्रपती संभाजीनगर–नागपूर, तसेच कल्याण मार्गे नांदेड–अहमदाबाद दरम्यान अमृत भारत एक्स्प्रेस सुरू करण्याची मागणी करण्यात आली आहे. Pune-Nanded Express: याशिवाय रात्रीच्या वेळी वाशिम–मुंबई दैनंदिन रेल्वे, बेंगळुरू–नांदेड गाडीचा विस्तार नागपूरपर्यंत, तसेच नांदेड–रायचूर–परभणी मार्गाचा विस्तार संभाजीनगर ते मैसूर पर्यंत करावा, अशी मागणी करण्यात आली. तसेच पटणा–पूर्णा साप्ताहिक रेल्वे संभाजीनगरपर्यंत वाढवावी आणि परभणी–नांदेड पुश-पुल दैनंदिन सेवा पूर्ववत सुरू करावी, असेही निवेदनात नमूद आहे. दरम्यान, चार वर्षांपूर्वी माजी रेल्वे राज्यमंत्री रावसाहेब दानवे यांच्या प्रयत्नांतून सुरू झालेली नांदेड–पुणे दैनंदिन रेल्वे २६ जानेवारीपासून हडपसरपर्यंत मर्यादित करण्यात आल्याने प्रवाशांची गैरसोय वाढल्याचे महासंघाने सांगितले. पहाटे हडपसर येथे उतरलेल्या प्रवाशांना पुणे शहरात जाण्यासाठी सार्वजनिक वाहतूक उपलब्ध नसल्याने खासगी वाहनांकडून जादा भाडे आकारले जात असल्याचा आरोप करण्यात आला. Pune-Nanded Express: या पार्श्वभूमीवर नांदेड–हडपसर रेल्वे पूर्ववत पुण्यापर्यंत चालवावी; अन्यथा सेवा बंद होण्याची भीती व्यक्त करत संबंधित अधिकाऱ्यांनी तातडीने निर्णय घ्यावा, अशी मागणी महासंघाने केली आहे. भेटीदरम्यान अरुण मेघराज, नारायणराव अकमर, अमित कासलीवाल, परमेश्वर अखाडे आदी उपस्थित होते.
