Pune Budget 2026 : महापालिकेचे आयुक्त नवल किशोर राम यांनी सन २०२६-२७ या आर्थिक वर्षासाठी १३ हजार ९९५ कोटी रुपयांचा अर्थसंकल्प सादर केला. शहराच्या सर्वांगीण विकासासाठी रस्ते विकास, सार्वजनिक वाहतूक सुधारणा, पर्यावरण संवर्धन आणि गृहनिर्माण प्रकल्पांना विशेष प्राधान्य देण्यात आले आहे. या वेळी महापौर मंजुषा नागपुरे, स्थायी समिती अध्यक्ष श्रीनाथ भिमाले, सभागृह नेते गणेश बिडकर, उपमहापौर परशुराम वाडेकर यांच्यासह महापालिकेचे अधिकारी उपस्थित होते. या अर्थसंकल्पात पायाभूत सुविधा बळकट करण्यासोबतच आधुनिक तंत्रज्ञानाचा वापर आणि पर्यावरण संरक्षणाचा समतोल साधण्याचा प्रयत्न करण्यात आला आहे. पथ विभाग आणि वाहतूक नियोजन शहरातील रस्ते जाळे सक्षम करण्यासाठी आणि वाहतूक कोंडी कमी करण्यासाठी पथ आणि प्रकल्प विभागामार्फत विविध तरतुदी करण्यात आल्या आहेत. कात्रज-कोंढवा रस्त्याच्या विकासासाठी १०० कोटी रुपयांची स्वतंत्र तरतूद करण्यात आली आहे. शहरातील ३२ मिसिंग लिंक रस्त्यांपैकी १२ रस्ते यावर्षी ताब्यात घेऊन विकसित करण्याचे नियोजन आहे. सर्वंकष वाहतूक आराखड्याअंतर्गत २०३४ पर्यंतच्या गरजा लक्षात घेऊन महामेट्रोच्या सहकार्याने उड्डाणपूल आणि पुलांचे नियोजन करण्यात येणार आहे. तसेच वाहतूक डेटा विश्लेषणासाठी कृत्रिम बुद्धिमत्ता आणि पार्किंग व्यवस्थापनासाठी जीआयएस मॅपिंगचा वापर करण्याची योजना आहे. सार्वजनिक वाहतूक पुणेकरांच्या प्रवासासाठी सार्वजनिक वाहतूक अधिक सक्षम करण्यासाठी पीएमपीएमएलच्या माध्यमातून १००० नवीन ई-बसेस भाडेतत्त्वावर ताफ्यात सामील केल्या जाणार आहेत. या बसेस केंद्र शासनाच्या फेम-२ योजनेअंतर्गत उपलब्ध होणार आहेत. बीआरटी स्थानकांवर सुरक्षारक्षक, सीसीटीव्ही कॅमेरे तसेच वॉटर जेट मशीनद्वारे स्वच्छतेची व्यवस्था करण्याचेही नियोजन करण्यात आले आहे. पर्यावरण आणि नदी संवर्धन मुळा-मुठा नदीतील प्रदूषण कमी करण्यासाठी मैलापाणी शुद्धीकरण केंद्रांची क्षमता सध्याच्या ४७३ एमएलडीवरून जवळपास दुप्पट करण्याचे उद्दिष्ट ठेवण्यात आले आहे. कोंढवा खुर्द येथे ३.८ एकर जागेवर नेचर बेस्ड फॅमिली पार्क विकसित करण्याची योजना आहे. तसेच शहरातील हवेची गुणवत्ता मोजण्यासाठी विविध ठिकाणी एअर क्वालिटी मॉनिटरिंग सेन्सर्स बसवण्यात येणार आहेत. घनकचरा व्यवस्थापन देवाची उरुळी येथील सुमारे १० लाख मेट्रिक टन कचऱ्यावर बायोमायनिंगद्वारे प्रक्रिया करण्याचे काम अंतिम टप्प्यात असून, रिजेक्ट कचऱ्यावर प्रक्रिया करण्यासाठी हडपसर येथे नवीन प्रकल्प उभारण्याचे नियोजन आहे. महिला आणि तृतीयपंथीयांसाठी विशेष सोयींनी युक्त स्मार्ट सार्वजनिक स्वच्छतागृहे विविध झोनमध्ये उभारण्याचीही तरतूद करण्यात आली आहे. गृहनिर्माण आणि सांस्कृतिक वारसा प्रधानमंत्री आवास योजनेंतर्गत बालेवाडी, हडपसर आणि इतर भागात सुमारे ४७०० घरांचे नियोजन करण्यात आले आहे. नवीन प्रकल्पांसाठी ३५ कोटी रुपयांची तरतूद करण्यात आली आहे. शहरातील बालगंधर्व रंगमंदिराचे आधुनिकीकरण आणि पुनर्विकास करण्याचा प्रस्ताव असून, महापालिकेच्या ७५ शाळा ‘आदर्श शाळा’ म्हणून विकसित करण्याचे नियोजन आहे. अर्थसंकल्प एका दृष्टिक्षेपात एकूण जमा : १३,९९४.९८ कोटी रुपये मिळकत कर उत्पन्न : ३,३५२.४० कोटी रुपये भांडवली खर्च : ५,९९१.०४ कोटी रुपये या अर्थसंकल्पातून शहरातील पायाभूत सुविधा मजबूत करण्याबरोबरच पर्यावरण संवर्धन आणि तंत्रज्ञानाधारित प्रशासनावर भर देण्याचा प्रयत्न करण्यात आल्याचे दिसून येते.
