पुणे – कोरेगाव पार्क भागातील शासकीय धान्य गोदामाच्या परिसरात शनिवारी मतमोजणी झाली. निवडणूक आयोगच्या आदेशानुसार मतमोजणी केंद्रावर उमेदवाराच्या प्रतिनिधींना प्रवेशासाठी ओळखपत्र देण्यात आली होती. त्यांना मोबाइल आणि इलेक्ट्रॉनिक गॅझेट नेण्यास बंदी होती. मात्र, तब्बल २१ जणांनी बुटामध्ये आणि मोज्यामध्ये मोबाइल लपवून आत नेल्याचा प्रकार उघडकीस आला. या कार्यकर्त्यांना पोलिसांंनी बाहेरचा रस्ता दाखवला. शासकीय धान्य गोदामाच्या परिसरात वडगावशेरी, शिवाजीनगर, कोथरूड, खडकवासला, पर्वती, हडपसर, कॅन्टोन्मेंट, कसबा या आठ विधानसभा मतदारसंघांची मतमोजणी झाली. या भागात प्रतिबंधात्मक आदेश लागू करण्यात आले असून, मतमोजणी केंद्रात केंद्रीय निवडणूक आयोगाच्या आदेशानुसार मोबाइल, तसेच अन्य इलेक्ट्राॅनिक उपकरणे नेण्यास मनाई करण्याचे आदेश सहपोलीस आयुक्त रंजनकुमार शर्मा यांनी दिले होते. मतमोजणी केंद्रात विनापरवानगी (पास) प्रवेश नाकारला जात होता. मतमोजणी केंद्रात काडीपेटी, तसेच अन्य ज्वलनशील पदार्थ नेण्यास मनाई करण्यात आली होती. माध्यमांच्या प्रतिनिधींनाही फक्त मीडिया सेंटरमध्येच मोबाइल आणि इलेक्ट्रॉनिक गॅझेट नेण्यास परवानगी होती. हे सर्व नियम लागू असले, तरी अनेकांनी चोरीछुपे मोबाइल नेण्याचा प्रयत्न केला. त्यांना रोखण्यासाठी ठिकठिकाणी मेटल डिटेक्टरने तपासणी करण्यात येत होती, तसेच हातानेही कर्मचारी तपासणी करत होते. मात्र, तरीही राजकीय पक्षाचे २० कार्यकर्ते आणि एक पत्रकार शूजमधून मोबाइल नेताना आढळून आला. केंद्राबाहेरचा रस्ता मोबाइल लपवून मतमोजनी केंद्रात नेत असल्याची बाब सहआयुक्तांच्या कानावर पडल्यावर त्यांनी तातडीने परिमंडळाच्या उपायुक्तांना तेथे धाडले. त्यांना सक्त सूचना देऊन मोबाइल नेणाऱ्यांना केंद्राबाहेरचा रस्ता दाखविण्यास सांगण्यात आले.
