मेट्रोचे रूळही ‘ट्रॅक’वर
9000 मेट्रिक टन रुळांची गरज
3000 मेट्रिक टन रूळ भाग-1-2 साठी गरजेचे
600 मेट्रिक टन रूळ नागपूरहून येणार
पिंपरी-चिंचवड ते संत तुकाराम नगरदरम्यान काम सुरू
पुणे – पिंपरी-चिंचवड ते संत तुकारामनगर मेट्रो स्थानकादरम्यान रूळ टाकण्याच्या कामाला गुरुवारपासून सुरुवात झाली. येत्या डिसेंबरपर्यंत पहिल्या मार्गावर मेट्रो धावण्याच्या दृष्टीने महामेट्रोचे हे पुढचे पाऊल आहे. दरम्यान, “बॅलास्ट’ तंत्रज्ञानामुळे या रुळांच्या कमीत कमी देखभालीची गरज असून ते पर्यावरणास अनुकूल
असून प्रदूषण मुक्त आहेत. शिवाय त्यांचा “रायडिंग कम्फर्ट’ चांगला असल्याचे मेट्रो प्रशासनाने म्हटले आहे.
डिसेंबरअखेर चाचण्यांचे नियोजन
पुणे मेट्रो रेल प्रकल्पात दोन मार्गिका आहेत. पिंपरी-चिंचवड महापालिका ते स्वारगेट 16.6 किमी आणि वनाज ते रामवाडी 14.6 किमी लांबीच्या मार्गिका आहेत. त्यापैकी पीसीएमसी ते रेंज हिल्स या 11.57 किमी मार्गावर उन्नत (एलिव्हेटेड) मार्ग उभारण्याचे काम वेगाने सुरू आहे. या मार्गावरच पुणे मेट्रोने डिसेंबरअखेर चाचण्या पूर्ण करण्याचे नियोजन केले आहे.
तंत्रज्ञानामुळे रुळांचे वाढणार आयुष्य
हे रेल्वे रूळ फ्लॅश बट आणि ऍल्युमिना थर्मिट वेल्डिंग तंत्रज्ञानाद्वारे एकमेकांना जोडण्यात येणार आहे. अशा जोडलेल्या रेल्वे रुळांचे अत्याधुनिक अल्ट्रा सॉनिक मशीनद्वारे टेस्टिंग केले जाणार आहे. या रेलचा वरचा भाग हा विशिष्ट तंत्रज्ञानाद्वारे कठीण केलेला असेल त्यामुळे या रुळाची झीज कमी होईल आणि त्यामुळे रुळांचे आयुष्य वाढेल तसेच वरचेवर रूळ बदलण्याची आवश्यकता पडणार नाही.
अत्याधुनिक रुळांचा वापर
हे रूळ हे स्टॅंडर्ड गेज (1435 एमएम) या प्रकारातले असून, (Ballastless) बॅलास्टविरहित असणार आहेत. तसेच यूआयसी 60 ई 1, 1080 ग्रेड, हेड हार्डन या प्रकारचे रेल्वे रूळ वापरणार आहे. जगभरात याच प्रकारचे रेल्वे रूळ वापरले जातात. महामेट्रोसाठी रेल्वे रूळ 18 मी. व 25 मी. या लांबीमध्ये वापरण्यात येतील.
सायबेरियात रुळांचे उत्पादन
पुणे मेट्रो प्रकल्पासाठी एकूण 9000 मेट्रिक टन रुळांची आवश्यकता आहे. रिच-1 आणि 2 या प्राधान्यक्रमासाठी एकूण 3000 मेट्रिक टन रूळ लागणार आहेत. नागपूरहून 600 मेट्रिक टन रूळ सध्या पुण्यासाठी येणार आहेत. हे रूळ इस्ट मेटल एजी या स्वित्झर्लंडच्या कंपनीने त्यांच्या सायबेरियातील कारखान्यात बनविले आहेत.
…म्हणून प्रवास होणार आरामदायी
पुणे मेट्रोचा उन्नत आणि भूमिगत मार्गाचा ट्रॅक हा “बॅलास्ट लेस’ या प्रकारातला असणार आहे. सामान्यतः रेल्वे प्रणालीत रेल्वे रूळ दगडाच्या खडीवर (बॅलास्ट) टाकण्यात येतात. त्यामुळे रुळावरून कोच जाताना रेल्वे रूळ खाली दाबले जाऊन कुशनसारखा परिणाम साधता येतो. बॅलास्टसहित रुळांचे अनेक तोटे असल्यामुळे पुणे मेट्रोमध्ये बॅलास्टविरहित रूळ टाकण्यात येणार आहे. यामुळे प्रवाशांना आरामदायक वाटणार आहे.
