Pune Metro : महाराष्ट्र मेट्रो रेल कॉर्पोरेशन लिमिटेडकडून (महामेट्रो) पुणे मेट्रो फेज २ प्रकल्पाच्या अंमलबजावणीसाठी ठोस पाऊले टाकण्यात आली आहेत. महामेट्रोने पुणे मेट्रोच्या लाईन हडपसर ते लोणी काळभोर (४बी) आणि हडपसर ते सासवड रेल्वे स्थानक (४सी) अंतर्गत येणाऱ्या एकूण १४ उन्नत मेट्रो स्थानकांसाठी सविस्तर डिझाइन सल्लागार नेमण्याकरिता निविदा मागविल्या आहेत. या निविदा ५ मार्च २०२६ रोजी खुल्या होणार आहेत. पुणे मेट्रो फेज २ अंतर्गत प्रस्तावित असलेली हडपसर ते लोणी काळभोर दरम्यानची ही मार्गिका ११.३५ किलोमीटर लांबीची असून, या मार्गावर १० स्थानके असणार आहेत. यामध्ये हडपसर फाटा, हडपसर बस डेपो, आकाशवाणी-हडपसर, लक्ष्मी कॉलनी, स्टड फार्म, मांजरी फाटा, द्राक्ष बागायतदार संघ, टोलनाका, वाक वस्ती आणि लोणी काळभोर या स्थानकांचा समावेश आहे. हा मार्ग पुणे शहराचा पूर्व भाग आणि पुणे जिल्ह्यातील वेगाने विकसित होत असलेल्या लोणी काळभोर परिसराला मेट्रोद्वारे जोडणार आहे. तर हडपसर ते सासवड रेल्वे स्थानक ही ५.५७ किलोमीटर लांबीची मेट्रो मार्गिका असून, या मार्गिकेवर हडपसर ग्लायडिंग सेंटर, फुरसुंगी आयटी पार्क, सुलभ गार्डन आणि सासवड रोड रेल्वे स्थानक अशी चार उन्नत स्थानके प्रस्तावित आहेत. फुरसुंगी आणि सासवड रोड परिसरात गेल्या काही वर्षांत मोठ्या प्रमाणावर औद्योगिक आणि निवासी विकास झाला असून, या लाईनमुळे येथील प्रवाशांना मोठा दिलासा मिळणार आहे. प्रत्यक्ष बांधकाम सुरू करण्यापूर्वी सविस्तर डिझाइन सल्लागारांची नियुक्ती अत्यंत महत्त्वाची असते. यामध्ये स्थानकांची रचना, संरचनात्मक आराखडा, प्रवाशांचे नियोजन तसेच आजूबाजूच्या रस्ते जाळ्याशी मेट्रोचे एकत्रीकरण यांचा समावेश असतो. हडपसर, मांजरी, फुरसुंगी, लोणी काळभोर आणि सासवड रोड परिसरातील वाढती लोकसंख्या आणि वाहतूक कोंडी लक्षात घेता हे दोन मेट्रो मार्ग अत्यंत महत्त्वाचे ठरणार आहेत. निविदा प्रक्रिया सुरू झाल्याने पुणे मेट्रो फेज २ हा प्रकल्प नियोजनाच्या टप्प्यातून प्रत्यक्ष अंमलबजावणीकडे वाटचाल करीत असल्याचे स्पष्ट झाले आहे. Pune News: पालिकेची राज्य शासनाकडे ३ हजार कोटींची थकबाकी
