Pune Market Yard – मार्केट यार्डातील आडत्यांच्या राजकारणात मोठी उलथापालथ झाली असून, सध्याच्या संघटनेविरोधात नाराजी वाढल्याने आडत्यांमध्ये उघड फूट पडली आहे. शेतमालाच्या खरेदी- विक्रीदरम्यान शेतकरी व आडतदारांना भेडसावणाऱ्या विविध समस्यांवर प्रभावी पाठपुरावा करण्यात सत्ताधारी गट अपयशी ठरत असल्याचा आरोप करत मागील निवडणुकीत प्रमुख विरोधक म्हणून भूमिका बजावणारे आडतदार अमोल घुले यांनी रविवारी (दि. १९) स्वतंत्र संघटनेची घोषणा केली. दरम्यान, निवडणुकीसाठी अर्ज भरण्याच्या शेवटच्या दिवशी कोणताही अर्ज न आल्याने श्री छत्रपती शिवाजी मार्केट यार्ड आडते असोसिएशनची निवडणूक बिनविरोध पार पडली. आडते असोसिएशनच्या त्रैवार्षिक निवडणुकीसाठी १९ एप्रिलपर्यंत उमेदवारी अर्ज दाखल करण्याची अंतिम मुदत होती. निवडणुकीपूर्वी दोन्ही गटांमध्ये अध्यक्षपद दीड-दीड वर्षे वाटून घेण्याबाबत चर्चा झाली होती. मात्र, अध्यक्षपदाची पहिली संधी कोणाला, यावर एकमत झाले नाही. यामुळे अखेर घुले यांनी स्वतंत्र भूमिका घेत श्री शारदा गजानन आडते असोसिएशन या नव्या संघटनेची घोषणा करत वेगळी वाट धरली. परिणामी, सत्ताधारी गटाव्यतिरिक्त अन्य कुणीही निवडणुकीत अर्ज दाखल केला नाही. यामुळे निवडणूक बिनविरोध झाली. आडत्यांमध्ये पडलेली ही फूट आगामी काळात बाजारातील निर्णय प्रक्रियेवर आणि शेतकरी आणि आडतदार संबंधांवर काय परिणाम करते, याकडे सर्वांचे लक्ष लागले आहे. नव्या संघटनेमुळे आडत्यांच्या प्रश्नांना नवी दिशा मिळणार की संघर्ष अधिक तीव्र होणार, हे येणाऱ्या काळात स्पष्ट होणार आहे. “मार्केट यार्डातील आडत्यांचे अनेक प्रश्न अद्यापही प्रलंबित आहे. त्या पार्श्वभूमीवर निवडणूक बिनविरोध करण्यासाठी पुढाकार घेत अध्यक्षपद दीड- दीड वर्ष वाटून घेण्याबाबत चर्चा पार पडल्या. सुरुवातीला होकार देणाऱ्या सत्ताधाऱ्यांनी अखेर शब्द फिरविला. त्यानंतर आडत्यांकडून नवीन संघटना काढण्याबाबत आग्रह धरण्यात आला. अखेर नव्या संघटनेचा निर्णय घेण्यात आला.” – अमोल घुले, नवीन संघटनेचे अध्यक्ष
