गतवर्षीच्या तुलनेत पावणे आठ लाख चालकांनी मोडले वाहतुकीचे नियम पुणे – वर्षभरात वाहतूक पोलिसांनी १८ लाख ७२ हजार बेशिस्त वाहन चालकांवर कारवाई केली असून, गतवर्षीच्या तुलनेत ही कारवाई सात लाख ६८ हजाराने अधिक आहे. तसेच, यंदा प्रत्यक्षात रस्त्यावरील कारवाईचे प्रमाण वाढविले असून, आतापर्यंत ५४ कोटी रुपयांहून अधिक दंड वसूल केला आहे. शहर पोलिसांच्या कामगिरीची माहिती देण्यासाठी आयोजित पत्रकार परिषदेत पोलिस आयुक्तांनी ही माहिती दिली. शहरात २०२३ मध्ये दहा लाख ३२ हजार ४१५ बेशिस्तांवर कारवाई झाली होती. २०२४ मध्ये ११ लाख चार हजार १४५ जणांवर दंडात्मक कारवाई झाली. दोन्ही वर्षांच्या तुलनेत यंदाच्या कारवाईत मोठी वाढ झाली आहे. यंदा एकेरी वाहतुकीच्या रस्त्यावर विरुद्ध दिशेने येणाऱ्या वाहनांवरील कारवाई सर्वाधिक झाली असून, जानेवारी ते २८ डिसेंबरअखेरपर्यंत पाच लाख एक हजार ६६७ बेशिस्तांवर कारवाई केली आहे. त्यापाठोपाठ टोईंग कारवाई दोन लाख १३ हजार ६४६, सिग्नल जम्पिंगच्या एक लाख ७१ हजार २०२, ट्रिपल सीटच्या ६८ हजार ९४०, राँग साइडच्या ४३ हजार ९४९, मोबाइलवर बोलणाऱ्यांवर ४१ हजार ९६१ अशी कारवाई झाली आहे. प्रत्यक्ष कारवाई वाढवली शहरात गेली काही वर्षे सीसीटीव्हीद्वारे कारवाई करण्याचे प्रमाण वाढले होते. मात्र, बेशिस्त वाहनचालकांना गांभीर्य कळावे, यासाठी प्रत्यक्ष रस्त्यावरील कारवाई वाढवून त्यांच्याकडून दंड वसुली करत प्रत्यक्ष वसुली करण्यााला प्राधान्य दिले. पोलिसांनी २०२३ मध्ये सात लाख २८ हजार ३२५ जणांकडून प्रत्यक्ष दंड वसुली केली होती. २०२४ मध्ये सात लाख ५२ हजार १८३ जणांकडून दंड वसूल केला. चालू वर्षात आठ लाख ९६ हडार ४२७ जणांकडून दंड वसूल केला आहे.
