पुणे-विश्वेश्वर सहकारी बॅंकेच्या 2023 ते 28 या कालावधीसाठी पार पडलेल्या पंचवार्षिक निवडणुकीत सुनील रूकारी यांच्या मार्गदर्शनाखाली आणि अनिल गाडवे यांच्या नेतृत्वाखाली श्री विश्वेश्वर पॅनेलमधील सर्व उमेदवारांनी उच्चांकी मते मिळवून विजय प्राप्त केला आहे. दि विश्वेश्वर सहकारी बॅंक ही मल्टिस्टेट बॅंक असून, एकूण 28 शाखांच्या माध्यमातून कर्नाटक व महाराष्ट्र या राज्यांत कार्यरत आहे. बॅंकेचा एकूण व्यवसाय 2,642 कोटींचा असून, नुकतीच रिझर्व्ह बॅंकेकडून इंटरनेट बॅंकिंगची परवानगी प्राप्त झाली आहे. 1972 मध्ये कै. नामदेवराव रूकारी, कै. भरतशेठ गाडवे व कै. बाबूराव हरपळे यांच्या पुढाकाराने स्थापन झालेल्या या बॅंकेचे सुवर्ण महोत्सवी वर्ष नुकतेच साजरे झाले. पॅनेलप्रमुख अनिल गाडवे यांना खुल्या गटात सर्वात जास्त म्हणजे 6776 इतकी मते मिळाली व महिला गटात रत्ना कसबेकर यांना 6852 इतकी मते मिळाली आहेत. पॅनेलमधील इतर विजयी उमेदवार श्रेयस रूकारी, राजेंद्र मिरजे, अमोल मणियार, मनोज साखरे, दत्तात्रय कामठे, अजय डोईजड, सुभाष लडगे, रवींद्र महाजन, सुलभा कोकाटे हे आहेत. विरोधी गटाचे पॅनेल प्रमुख नरेंद्र व्यवहारे यांना 260 मते मिळाली असून त्यांच्या पॅनेलमधील सर्व उमेदवारांची अनामत रक्कम जप्त झाली आहे. दि विश्वेश्वर बॅंकेचा व्यवसाय आगामी 3 वर्षात 5,000 कोटींपर्यंत नेण्याची घोषणा गाडवे यांनी निवडणुकीनिमित्त आयोजित केलेल्या विशेष सर्वसाधारण सभेमध्ये केली. सदर निवडणुकीचे निवडणूक निर्णय अधिकारी म्हणून आनंद कटके, उपनिबंधक, सहकारी संस्था हे होते.
