रांजणगाव गणपती – रांजणगाव औद्योगिक वसाहतीत व कारेगाव परिसरात संध्याकाळी कंपन्या सुटल्यावर वाहनांच्या प्रचंड गर्दीमुळे वाहतूक कोंडीची मोठी समस्या होत आहे. हजारो कामगार आपल्या दुचाकी व चारचाकींनी रस्त्यावर उतरल्याने पुणे-नगर महामार्ग तसेच अंतर्गत रस्त्यांवर लांबच लांब वाहनांच्या रांगा लागतात.

या गर्दीमुळे स्थानिक नागरिक त्रस्त झाले असून, शालेय बसेस, रुग्णवाहिका व इतर तातडीच्या वाहनांनाही अडथळा निर्माण होतो. पावसाळ्यात ही समस्या आणखी गंभीर बनते.

वाहतूक पोलिसांकडून व्यवस्थापनाच्या प्रयत्नांना सुरूवात झाली असली तरी कामगारांची संख्या व वाहनांची वाढती संख्या लक्षात घेता उपाययोजना अपुऱ्या पडत आहेत. औद्योगिक क्षेत्राला लागून असलेल्या कारेगाव, रांजणगाव, शिरूर या भागातील नागरिकांनी कायमस्वरूपी सोयीस्कर वाहतूक आराखडा तयार करण्याची मागणी प्रशासनाकडे केली आहे.

स्थानिकांच्या मागण्या

* कंपन्या सुटण्याच्या वेळा टप्प्याटप्प्याने ठेवाव्यात

*  अतिरिक्त वाहतूक पोलिसांची नेमणूक करावी

*  पार्किंगसाठी वेगळ्या जागांचा आराखडा करावा

* महामार्गाचे रुंदीकरण करावे