नारायणगाव : पहेलगाम येथील अतिरेकी हल्ल्यानंतर काश्मीरच्या विविध भागात अडकून पडलेल्या शिरूर लोकसभा मतदारसंघातील पर्यटकांना सुरक्षित महाराष्ट्रात घेऊन येण्यासाठी खासदार डॉ. अमोल कोल्हे यांनी पंतप्रधान नरेंद्र मोदी, केंद्रीय गृहमंत्री अमित शहा आणि नागरी विमान वाहतूकमंत्री मुरलीधर मोहोळ यांना पत्राद्वारे आवाहन केले आहे. शिरूर लोकसभा मतदारसंघातील खेड व हवेली तालुक्यातील अनेक पर्यटक काश्मीरला पर्यटनासाठी गेलेले आहेत. पहेलगाम येथे अतिरेकी हल्ला झाल्यानंतर श्रीनगर, पुलवामासह काश्मीरमध्ये विविध ठिकाणी पर्यटक अडकून पडले आहेत. मात्र अतिरेकी हल्ल्यानंतर लष्कर आणि पोलीसांनी शोधमोहीम सुरू केली असून दुकाने, वाहतूक पूर्णतः बंद झाल्याने पर्यटकांना विमानतळ, रेल्वे स्टेशनपर्यंत पोहोचता आले नाही. परिणामी पर्यटकांमध्ये भीतीचे वातावरण निर्माण झाले आहे. हवेली आणि खेड तालुक्यातील पर्यटकांनी खासदार डॉ. अमोल कोल्हे यांच्या कार्यालयाशी संपर्क साधून मदतीची अपेक्षा व्यक्त केली. त्यानंतर खासदार डॉ. कोल्हे यांनी पर्यटकांशी मोबाईल कॉल करुन चर्चा करीत सर्वतोपरी सहकार्य करण्याचे आश्वासन दिले. त्यानंतर श्रीनगरच्या जिल्हा प्रशासनाशी संपर्क साधून पर्यटकांना आवश्यक ते सहकार्य करण्याच्या सूचना देण्यात आल्या आहेत. पंतप्रधान नरेंद्र मोदी, गृहमंत्री अमित शहा आणि नागरी विमान वाहतूकमंत्री मुरलीधर मोहोळ यांना पत्र पाठवून काश्मीरमध्ये विविध ठिकाणी अडकलेल्या शिरूर लोकसभा मतदारसंघातील पर्यटकांना सुरक्षित महाराष्ट्रात परत येण्यासाठी आवश्यक सहकार्य करण्याची मागणी केली आहे. त्याचबरोबर डॉ. कोल्हे यांनी मतदारसंघातील पर्यटकांच्या सुरक्षेला प्रथम प्राधान्य असून त्यासाठी आवश्यक ती सर्व पावलं उचलली जातील असे स्पष्ट करीत नातेवाईकांना आश्वस्त केले.
