पिरंगुट : मुळशी तालुक्याच्या पूर्व भागातील पिरंगुट, भुगाव, भूकूम, लवळे, नांदे, चांदे आणि सुस ही सात गावे फेब्रुवारीपासून पिंपरी चिंचवड पोलीस आयुक्तालयाच्या हद्दीमध्ये समाविष्ट केलेली आहेत. ही समाविष्ट गावे पुन्हा पुणे ग्रामीण पोलीस अधीक्षक कार्यालयाकडेच ठेवावीत, यासाठी या गावातील ग्रामस्थांनी तसेच ग्राम पंचायतींनी ग्रामसभेचे ठराव तसेच विविध संघटनांनी मागणीची पत्रे पौड पोलीस स्टेशनला तसेच पुणे जिल्हा पोलीस अधीक्षक कार्यालय व पालकमंत्री यांना दिलेली होती. त्या अनुषंगाने पुणे जिल्हा पोलीस मुख्यालयाकडून या संदर्भात पुन्हा एकदा अहवाल सादर करण्याचा लेखी आदेश उपविभागीय पोलीस अधिकारी कार्यालयाला मिळालेला आहे. ही गावे पिंपरी चिंचवड पोलीस आयुक्तालयामध्ये समाविष्ट केल्यानंतर स्थानिक ग्रामस्थांनी विविध संघटनांनी प्रचंड मोठ्या प्रमाणामध्ये याला विरोध केला होता. तो अहवाल ती पत्रे पौड पोलिसांनी पुणे जिल्हा पोलीस अधीक्षकांकडे पाठवली होती त्याच अनुषंगाने हा अहवाल मागवण्यात आला आहे. या गावातील नागरिकांना बावधनपेक्षा पौड हे अतिशय सोईस्कर आहे. कारण पौड हे तालुक्याचे मुख्यालय असून त्या ठिकाणी पोलीस स्टेशन,तहसील कचेरी भूमी अभिलेख उपाधीक्षक कार्यालय कोर्ट पंचायत समिती कार्यालय सहाय्यक निबंधक कार्यालय अशी सगळी महत्त्वाची कार्यालय आहेत. तसेच काही वरिष्ठ कार्यालयाशी संपर्क करायचा झाल्यास पुणे जिल्हा पोलीस अधीक्षक कार्यालय हे पाषाणमध्ये आहे आणि त्या ठिकाणी सर्वसामान्य नागरिक अतिशय सहजपणे जातो. पौडवरून पुणे जिल्हा पोलीस अधीक्षक कार्यालयामध्ये जाण्यासाठी फक्त एकच बस बदलावी लागते. परंतु त्या उलट पिंपरी चिंचवड पोलीस आयुक्त कार्यालयात जायचे असेल तर बसने जाताच येत नाही. त्यासाठी गाडीच घेऊन जावी लागते आणि सर्वसामान्य नागरिकांना ते शक्य नाही. या सर्वसामान्य नागरिकांचा विचार लोकप्रतिनिधींनी करण्याची आवश्यकता आहे. तालुक्याच्या सर्वसामान्य नागरिकांना जे सहज शक्य आणि सोपे सोयीस्कर आहे असेच पोलीस स्टेशन ठेवावे, अशी मागणी या पाचही गावातील नागरिकांनी केलेली आहे.
