कडूस : मुख्यमंत्री माझी शाळा सुंदर शाळा स्पर्धेत मागील पहिल्याच वर्षी रानमळा शाळेने शासकीय शाळांच्या गटात खेड तालुक्यात तृतीय क्रमांक मिळवून एक लाख रुपयांचे बक्षीस मिळविले होते. या वर्षी रानमळा शाळेने ही कामगिरी अधिक उंचावत खेड तालुक्यात शासकीय शाळांच्या गटात प्रथम क्रमांक मिळवून तब्बल तीन लाख रुपयांचे पारितोषिक मिळविले आहे. महाराष्ट्र राज्यातील सर्व शासकीय , निमशासकीय व खासगी शाळांच्या सर्वांगीण विकासासाठी राज्य शासनाच्या वतीने मुख्यमंत्री माझी शाळा सुंदर शाळा या स्पर्धेचे 2023/2024 या वर्षापासून आयोजन करण्यात आले आहे. शाळांसाठी आवश्यक सर्व भौतिक सुविधांनी शाळा परिपूर्ण व्हाव्यात यामूळे प्रत्येक विद्द्यार्थी गुणवत्ताधारक व्हावा या उद्देशाने राज्य सरकारने या स्पर्धेचे आयोजन केले आहे. केंद्र , बीट , तालुका , जिल्हा व राज्य या टप्प्यात शाळांचे मूल्यमापन करून तालुका, जिल्हा व राज्य पातळीवर प्रथम तीन क्रमांक मिळविणार्या शाळांना भरघोस बक्षीसे या स्पर्धेअंतर्गत देण्यात येत आहेत. नुकत्याच पंचायत समितीच्या वतीने या स्पर्धेचा निकाल जाहीर करण्यात आल्याचे रानमळा शाळेच्या मुख्याध्यापिका सुनंदा ढमाले यांनी सांगितले. यशाबद्दल केंद्रप्रमुख विलास पर्हाड, रामदास लांघी, आशा बोंबले, मुख्याध्यापिका सुनंदा ढमाले, उपशिक्षक बाबाजी शिंदे, संपत गायकर, कविता जाधव, आणि सलिम शेख आदींनी अभिनंद केले आहे.
