राष्ट्रवादी युवक कॉंग्रेसचे सरचिटणीस संग्रामसिंह पाटील यांची ग्वाही

इंदापूर – राज्यात सत्तांतर झाले त्यामुळे राष्ट्रवादी कॉंग्रेसचा युवक कदापी खचणार नाही. राष्ट्रवादी कॉंग्रेस पक्षाध्यक्ष शरद पवार, विरोधी पक्षनेते अजित पवार, प्रदेशाध्यक्ष जयंत पाटील यांच्या मार्गदर्शनाखाली युवक राष्ट्रवादी कॉंग्रेस मजबूत करण्यावर भर दिला जाईल, अशी ग्वाही राष्ट्रवादी युवक कॉंग्रेसचे प्रदेश सरचिटणीस संग्रामसिंह पाटील यांनी दिली.

मुंबई येथे राष्ट्रवादी युवक कॉंग्रेसच्या वतीने प्रदेश कार्यकारिणीची विशेष बैठक राष्ट्रवादी कॉंग्रेसचे पक्षाध्यक्ष शरद पवार यांच्या प्रमुख उपस्थितीत पार पडली. यावेळी बारामती लोकसभा मतदारसंघातील राष्ट्रवादी युवक कॉंग्रेसचे प्रदेश सरचिटणीस संग्रामसिंह पाटील बोलत होते.

यावेळी प्रदेशाध्यक्ष जयंत पाटील, विरोधी पक्ष नेते अजित पवार, खासदार सुप्रिया सुळे, माजी मंत्री छगन भुजबळ, एकनाथ खडसे, युवक प्रदेशाध्यक्ष महबूब शेख, युवक कार्याध्यक्ष रविकांत वर्पे, सूरज चव्हाण यांच्यासह राज्यातील युवक राष्ट्रवादी कॉंग्रेसचे प्रमुख पदाधिकारी मोठ्या संख्येने उपस्थित होते.

राष्ट्रवादी युवक कॉंग्रेसमध्ये काम करताना पवार यांच्याकडे बघून राज्यातील युवकांना मोठी ऊर्जा मिळते आपोआपच मनोबल वाढते. नुकतेच झालेले सत्तांतर, हे कोणत्याही तत्त्वात बसत नाही. हे राज्यातील युवकांनी पक्के ओळखले आहे.

राज्यातील राष्ट्रवादीचा युवक मजबूत संघटन करून विरोधकांना जागा दाखवण्यासाठी आगामी काळात काम करेल. यासाठी आम्ही कटिबद्ध आहोत. युवक राष्ट्रवादीच्या माध्यमातून कार्यशाळा आयोजित करून नवी बळकटी मिळावी, अशीही अपेक्षा संग्रामसिंह पाटील यांनी व्यक्‍त केली.