-लाखेवाडी, इंदापूर तालुक्यात प्रथमच एआय व एमएल इंजिनिअरिंग शाखेस सुरुवात इंदापूर – इंदापूर तालुक्यातील लाखेवाडी येथील,जय भवानीगड विकास प्रतिष्ठान संचलित,विद्यानिकेतन विद्यानिकेतन इन्स्टिट्यूट ऑफ इंजिनिअरिंग अँड टेक्नॉलॉजी या महाविद्यालयास शासनाची मान्यता मिळाली आहे. ग्रामीण भागातील विद्यार्थ्यांना गुणवत्तापूर्ण शिक्षण देण्यासाठी,जय भवानीगड विकास प्रतिष्ठानच्या माध्यमातून प्रेसिडेन्सी इंटरनॅशनल स्कूल, विद्यानिकेतन स्कूल अँड ज्युनिअर कॉलेज व विद्यानिकेतन कॉलेज ऑफ फार्मसीची स्थापना श्रीमंत ढोले यांनी केली.विद्यार्थ्यांना गुणवत्ता पूर्ण शिक्षणाबरोबरच विद्यार्थ्यांना, व्यावसायिक संधी देखील उपलब्ध झाल्या पाहिजेत व ग्रामीण भागामध्ये उच्च शिक्षणाच्या सर्वोत्तम संधी उपलब्ध व्हाव्यात, यासाठी अभियांत्रिकी महाविद्यालयाची निर्मिती केली. शैक्षणिक वर्ष 2025 26 मध्ये विद्यानिकेतन अभियांत्रिकी महाविद्यालयास आॅल इंडिया कौन्सिल फाॅर टेक्निकल एज्युकेशनची मान्यता व डॉ.बाबासाहेब आंबेडकर तंत्रशास्त्र विद्यापीठ लोणेरे,त्याचबरोबर तंत्र शिक्षण संचालनालय, महाराष्ट्र राज्य यांचीही मान्यता मिळाली असून चालू शैक्षणिक वर्षापासून (2025-26) विद्यानिकेतन इन्स्टिट्यूट ऑफ इंजिनिअरिंग अँड टेक्नॉलॉजी, लाखेवाडीमध्ये चार विविध कोर्सेस सुरू होत आहे. यात एआय अँड एमएल (आर्टिफिशियल इंटेलिजन्स अँड मशिन लर्निंग), सिव्हिल इंजिनिअरिंग, इएनटीसी (इलेक्ट्रॉनिक अॅड टेलेकम्युनिकेशन), काॅम्प्युटर सायन्स अँड इंजिनिअरिंग या शाखेतील प्रत्येक शाखेमध्ये साठ विद्यार्थी क्षमतेस शासनाची मान्यता मिळालेली आहे. तसेच ट्रेनिंग व भविष्यातील नोकरीच्या संधीसाठी विविध आंतरराष्ट्रीय व व्यावसायिक कंपनीबरोबर सामंजस्य करार झाले आहेत. तसेच संस्थेत काम करणाऱ्या सर्व शिक्षक शिक्षकेतर कर्मचाऱ्यांचे अभिनंदन केले व आपण केलेल्या प्रयत्नामुळेच संस्थेला विविध शैक्षणिक अभ्यासक्रम सुरू करण्याचे बळ मिळत आहे. यावेळी संस्थेच्या उपाध्यक्षा चित्रलेखा ढोले,संस्थेचे मुख्य सल्लागार प्रदीप गुरव,संस्थेचे सचिव हर्षवर्धन खाडे, संस्थेच्या सहसचिवा पौर्णिमा खाडे, संस्थेचे विश्वस्त पृथ्वीराज ढोले, ऋषीकेश डोले व प्राचार्य डॉ. सम्राट खेडकर, गणेश पवार, राजेंद्र सरगर, सर्व विश्वस्त, शिक्षक व शिक्षकेतर कर्मचारी उपस्थित होते. लाखेवाडीला शैक्षणिक हब बनविणार श्रीमंत ढोले यांनी कॉलेज निर्मितीपाठीमागचा उद्देश हा विद्यार्थ्यांना ग्रामीण भागामध्ये मोठ्या शहरात,मिळणाऱ्या सर्व भौतिक सुविधा लाखेवाडीमध्ये उपलब्ध करून देऊन तज्ज्ञ प्राध्यापकाच्या माध्यमातून विद्यार्थ्यांना गुणवत्तापूर्ण दर्जेदार शिक्षण देण्याचा प्रयत्न केला जाईल व या पुढील काळात देखील प्रत्येक वर्षी नवीन अभ्यासक्रम संस्थेत सुरू करण्याचा मानस बोलून दाखवला. तसेच इंदापूर तालुक्यातील लाखेवाडीला नवीन शैक्षणिक हब बनवण्याचा सर्वोत्तम प्रयत्न करणार असल्याचे मत यावेळी व्यक्त केले.
