वीरधवल जगदाळे यांची पत्रकार परिषदेत माहिती दौंड – भाजपचे आमदार राहुल कुल यांच्या दौंडच्या जागेवर राष्ट्रवादी काँग्रेस पक्षाने दावा केला आहे.. दौंड विधानसभेची जागा राष्ट्रवादी काँग्रेस पक्षाला मिळावी, अशी मागणी उपमुख्यमंत्री अजित पवार यांचे निकटवर्तीय, दौंड शुगर कारखान्याचे संचालक वीरधवल जगदळे यांनी उपमुख्यमंत्री राष्ट्रवादी काँग्रेस पार्टीचे अध्यक्ष अजित पवार यांच्याकडे केली आहे. याबाबत जगदाळे यांनी दौंडमध्ये पत्रकार परिषद घेत ही माहिती दिली. आगामी महाराष्ट्र विधानसभा निवडणूक नोव्हेंबर २०२४ पर्यंत होत आहे.. सध्या राज्यात महायुतीचे सरकार आहे. दौंड तालुक्याच्या दृष्टिकोनातून दौंड विधानसभा मतदारसंघाची जागा राष्ट्रवादी काँग्रेस पार्टीला फायद्याची ठरणार आहे. दौंड तालुक्यात राष्ट्रवादी काँग्रेस पार्टीची मोठी फळी आहे. सद्यस्थितीत पक्षाचे सर्व पदाधिकारी पक्षाच्या माध्यमातून विविध स्तरावर काम करीत असणारे कार्यकर्ते हे एकसंघ राहून चांगले काम करीत आहेत. मावळत्या जिल्हा परिषद पंचायत समिती, दौंड नगरपालिकेमध्ये आपल्या पक्षाचे निर्विवाद वर्चस्व होते, कृषी उत्पन्न बाजार समितीमध्ये आपल्याला 50 टक्के यश जरी मिळाले असले तरी नुकत्याच झालेल्या खरेदी विक्री संघाच्या निवडणुकीत १०० टक्के यश प्राप्त झाले आहे, दौंड शहर व तालुक्यात राष्ट्रवादी काँग्रेस पक्षावर किंबहुना पक्षाच्या विचारधारेवर प्रेम करणारे अनेक कार्यकर्ते, मतदार असल्याने ही जागा राष्ट्रवादी काँग्रेस पार्टीकडे असावी अशी आमची विनंती आहे, २०१९ साली झालेल्या विधानसभेच्या निवडणुकीत आपल्या पक्षाच्या उमेदवाराचा अतिशय अल्पमतांनी पराभव झाला ही गोष्ट याची साक्ष देते. उपमुख्यमंत्री अजित पवार हे राज्यभर करत असलेले काम त्याचप्रमाणे जाहीर केलेल्या शासकीय योजना लोकांपर्यंत पोहोचवण्याचे काम कार्यकर्ते दौंड तालुक्यात करीत आहेत, याचा फायदा निश्चितच येत्या विधानसभेत पक्षाला होईल अशी खात्री आहे. जगदाळे यांच्या मागणीनंतर वादळ? वीरधवल जगदाळे यांच्या मागणीनंतर दौंडच्या जागेवरून महायुतीमध्ये वादाची शक्यता निर्माण झाली आहे बारामती लोकसभेला सुनेत्रा पवार यांनी निवडणूक लढवी, अशी पहिली मागणी देखील जगदाळे यांनी केली होती. ती मागणी मान्य देखील झाली होती. यावेळी दौंड विधानसभेची जागा राष्ट्रवादी काँग्रेस पक्षाकडे गेल्यास आमदार राहुल कुल यांना मोठा राजकीय धक्का बसण्याची शक्यता वर्तवली जात आहे. अजित पवार गटाचा उमेदवार निवडून आणू जगदाळे म्हणाले की, आगामी विधानसभेच्या दृष्टिकोनातून जागा वाटपासंदर्भात महायुतीमध्ये समावेश असलेल्या पक्षांची चर्चा सुरू असल्याचे समजते, दौंड विधानसभेची जागा राष्ट्रवादी काँग्रेस पार्टीकडे घ्यावी, आपण जो उमेदवार द्याल त्या उमेदवारास भरघोस मतांनी निवडून आणण्याची ग्वाही देत आहोत असे पत्राद्वारे जगदाळे यांनी उपमुख्यमंत्री अजित पवार यांच्याकडे मागणी केली आहे.
