प्रभात वृत्तसेवा पुणे – पतीला आत्महत्येस प्रवृत्त केल्याप्रकरणी पत्नी आणि सासूला सात वर्षे सक्तमजुरी आणि २५ हजार रुपये दंडाची शिक्षा अतिरिक्त सत्र न्यायाधीश ए. आय. पेरमपल्ली यांनी सुनावली. पत्नीच्या मानसिक त्रासाला कंटाळून आत्महत्या करत असल्याची चिठ्ठी लिहून पतीने गळफास घेतला होता. दररोजच्या भांडणांना कंटाळून पती आत्महत्येसारखे पाऊल उचलू शकतो, याची जाणीव असतानाही आरोपी त्याच्याशी निष्ठूरपणे वागले, असे नमूद करत न्यायालयाने हा निकाल दिला. कोमल दीपक चौधरी (वय ३१) आणि शालिनी कृष्णा कोल्हे (वय ५५) अशी आरोपींची नावे आहेत. त्यांना आत्महत्येस प्रवृत्त केल्याच्या कलमानुसार न्यायालयाने ही शिक्षा सुनावली. कोमलचा पती दीपक चौधरी यांनी २४ नोव्हेंबर २०१५ रोजी राहत्या घरी आत्महत्या केली. त्यांच्या बहिणीने पिंपरी पोलिसांत तक्रार दिली होती. दीपक आणि कोमलचा विवाह २०१० मध्ये झाला. या दोघांचाही हा दुसरा विवाह होता. त्यांना एक मुलगी आहे. दीपक तळेगाव दाभाडे येथील एका वाहनोद्योग कंपनीत कामाला होता. कोमलला ऐषोआरामात जगण्याची सवय होती. त्यासाठी ती दीपकला क्षुल्लक कारणांवरून त्रास द्यायची. मारहाण करून उपाशी ठेवायची. त्याच्या आईला शिवीगाळ करायची. तिने त्याला घरासाठी वडिलांकडून कर्ज घ्यायला लावले. त्यानंतर ते कर्ज फेडण्यासाठी पती व सासूला त्रास दिला. सुनेने मारहाण केल्याप्रकरणी दीपकच्या आईने पोलिसांकडे तक्रारही दिली होती. वारंवारच्या छळाला कंटाळून दीपकने आत्महत्या करण्याचा प्रयत्न केला, तेव्हा सोसायटीतील शेजारच्यांनी वॉचमनच्या मदतीने त्याला वाचविले. मात्र, मानसिकदृष्ट्या अस्थिर असतानाही, कोमल व तिची आई त्याच्याशी भांडत राहिल्यामुळे त्याने एका रिकाम्या सदनिकेत गळफास घेत जीवन संपविले.या खटल्यात अतिरिक्त सरकारी वकील प्रदीप गेहलोत यांनी बाजू मांडली. त्यांनी दीपकची आई, तक्रारदार बहीण, सोसायटीचा सुरक्षारक्षक, त्याचे मित्र अशा १४ जणांची साक्ष नोंदविली.
