Pune Crime – सेवानिवृत्त ८७ वर्षीय मेजेरच्या धनादेश पुस्तकाची चोरी करून१ कोटी ११ लाख ९३ हजारांचा आर्थिक गंडा घातला असून काम करणाऱ्या केअर टेकरने साथीदाराच्या मदतीने हा प्रकार केला आहे.पेन्शन काढताना खात्यातील पैसे कमी झाल्याचे निदर्शनास आल्यानंतर मेजर यांनी बँकेला कळविले होते. एक व्यक्ती धनादेश घेऊन आल्याची माहिती बँकेने पोलिसांना दिली. त्यानुसार केअर टेकरचा साथीदार सुप्रितसिंग भुपेंद्र कंडारिया (३९,रा. कोथरुड) याला अटक केली असून केअर टेकर राज शहासह इतरांविरुद्ध गुन्हा दाखल केला आहे. याप्रकरणी सेवानिवृत्त मेजर बोमन इरुशॉ अमारिया (८७) यांनी फिर्याद दिली असून हा प्रकार मार्च २०२५ ते २८ जानेवारी दरम्यान घडला.बोमन अमारिया यांना मुलबाळ अथवा वारसदार नाही. ते एकटेच असल्याने त्यांनी राज शहा याला केअर टेकर नेमले होते. मात्र तो फरार झाला. त्यावेळी त्याने बोमन यांचे धनादेश पुस्तक लंपास केले. काही काळाने ते वृद्धाश्रमात राहायला गेले. त्यांच्या खात्यात पेन्शन नियमितपणे जमा होत होती. ते वृद्धाश्रमात असताना राज शहा याने सुप्रितसिंग कंडारिया व इतरांच्या मदतीने बँकेतून पैसे काढले. बनावट सही करुन वेळोवेळी १ कोटी ११ लाख ९३ हजार ९०० रुपयांची रक्कम काढली. पैसे कमी झाल्याचे बोमन यांनी बँकेशी संपर्क साधला. त्यांनी सांगितले की, जर कोणी माझ्या धनादेशाद्वारे पैसे काढण्यास आला तर तुम्ही ही माहिती मला किंवा पोलिसांना द्या. कॅम्प मधील बँक ऑफ इंडियामध्ये सुप्रितसिंग हा पैसे काढण्यासाठी आला. बँकेने लष्कर पोलिसांना ही माहिती दिली. त्यानुसार पोलिसांनी त्याला पकडले. राज शहा याचा पोलीस शोध घेत आहेत. शहाला बोमन यांच्या बँक खात्याची सर्व माहिती होती. त्याने धनादेशावर बोमन यांच्या सह्या अगोदरच घेऊन ठेवल्या असाव्यात किंवा बनावट सह्या केल्या असाव्यात असा अंदाज आहे.
