प्रभात वृत्तसेवा पुणे – येरवडा कारागृहातून शिवाजीनगर कोर्टात सुनावणीसाठी नेण्यात येणाऱ्या कैद्यांच्या बंदोबस्तासाठी नेमलेल्या एका पोलीस कर्मचाऱ्याने सहकाऱ्याला जीवे मारण्याची धमकी दिली. मी पोलीस आयुक्तांना घाबरत नाही, असे सुनावत सहकाऱ्याला दगड फेकून मारण्याचा प्रयत्न केला. याची गंभीर दखल घेऊन संबंधित कर्मचाऱ्याला पोलीस उपायुक्त राजलक्ष्मी शिवणकर यांनी निलंबित केले आहे. केशव महादू इरतकर असे निलंबित पोलिसाचे नाव आहे. तो शिवाजीनगर पोलीस मुख्यालयात नियुक्तीस आहे. कैद्यांच्या बंदोबस्तावर नियुक्ती असताना ११ नोव्हेंबर रोजी इरतकर येरवडा कारागृहात कैद्यांना आणण्यासाठी गेले होते. त्याच्यासोबत संदीप नाळे बंदोबस्तास होते. यावेळी दोघांत किरकोळ कारणावरुन वाद झाला. तुम्ही निवृत्त सैनिक काही कामाचे नाहीत.माझ्याविरुद्ध दोन गुन्हे दाखल आहेत. मी पोलीस आयुक्तांना घाबरत नाही, असे सुनावले. पोलीस उपनिरीक्षक धायगुडे यांनी त्याला समाजवून सांगितले. इरतकरने नाळे यांना शिवीगाळ केली. रस्त्यावर पडलेला दगड उचलून जीवे मारण्यााची धमकी दिली.या वर्तुणकीबाबतचा अहवाल वरिष्ठ पोलीस निरीक्षकांनी पोलीस उपायुक्त राजलक्ष्मी शिवणकर यांना पाठविला. याप्रकरणी चौकशी केली. सार्वजनिक ठिकाणी इरतकरने केलेले वर्तन पोलीस दलाची प्रतिमा मलिन करणारे, अशोभनीय असल्याने पोलीस उपायुक्त शिवणकर यांनी त्याला निलंबित केले.
