Pune Crime – विवाहविषयक संकेतस्थळावरील ओळखीतून एका महिलेस तब्बल ५९ लाख ३७ हजारांना फसवले असून याप्रकरणी चोरट्याविरुद्ध चंदननगर पाेलिसांनी गुन्हा दाखल केला. फिर्यादीनुसार ४४ वर्षीय महिला नगर रस्ता भागताील वडगाव शेरीत राहायला आहेत. महिलेने एका विवाहविषयक संकेतस्थळावर नाेव्हेंबर २०२४ मध्ये नावनोंदणी केली होती. नावनोंदणीनंतर चोरट्याने महिलेशी संपर्क साधून विवाह करण्याबाबत उत्सुक असल्याचे सांगितले. त्यानंतर महिलेला जाळ्यात ओढले. वेगवेगळी कारणे देऊन चोरट्याने महिलकेडे पैसे मागण्यास सुरुवात केली. महिलेने खातरजमा न करता चोरट्याच्या खात्यात वेळोवेळी दीड वर्षात पैसे जमा केले. चोरट्याच्या खात्यात जवळपास ५९ लाख ३७ हजार रुपये जमा केले. महिलेने विवाहाबाबत विचारणा केल्यानंतर त्याने टाळाटाळ सुरु केली. महिलेला त्याने जिवे मारण्याची धमकी दिली. पैसे जमा केल्यानंतर चोरट्याने त्याचा मोबाइल बंद केला. फसवणूक झाल्याचे लक्षात आल्यानंतर महिलेने पोलिसांकडे तक्रार दिली. सहायक पोलीस निरीक्षक जगदाळे तपास करत आहेत. विवाहाच्या आमिषाने फसवणूक करण्याचे प्रकार वाढले आहेत. विवाहविषयक संकेतस्थळावर नावनोंदणी करताना महिलांनी संबंधित संकेतस्थळाबाबतची माहिती घ्यावी. अनोळखी व्यक्तीने आमिष दाखविल्यास खातरजमा करावी, असे आवाहन पोलिसांनी केले आहे.
