पुणे – हॉटेलात खाद्यपदार्थ बनविण्यासाठी घरगुती सिलेंडरचा वापर केल्याप्रकरणातून कॅम्प येथील चालकाची तब्बल 14 वर्षांनी सबळ पुराव्या अभावी निर्दोष मुक्तता केली आहे. लष्कर न्यायालयातील सह प्रथमवर्ग न्यायदंडाधिकारी ए.एस.देशपांडे यांनी हा आदेश दिला.
जप्त केलेला सिलेडर घरगुती वापराचा असल्याचे सरकारी पक्ष सिध्द करू शकले नाही. तसेच हॉटेल चालक आणि तेथे कर्मचाऱ्यांचा जबाब नोंदविण्यात आला नसल्याने गुन्हा सिध्द होत नसल्याचा निष्कर्ष काढत न्यायालयाने हा आदेश दिला.
रियाज अब्दुला मित्तल (वय 40, रा. भवानी पेठ) असे त्या हॉटेल व्यावसायिकाचे नाव आहे. बचाव पक्षातर्फे ऍड. साजीद शाह आणि ऍड. उमेश गवळी यांनी काम पाहिले. पोलीस उपनिरीक्षक एस. आर. गांधी यांनी 9 सप्टेंबर 20016 रोजी याबाबत फिर्याद दिली आहे. ते लष्कर पोलीस स्टेशनच्या हद्दीत रात्री गस्त घालत होते. त्यावेळी कॅम्प येथील आग्रा हॉटेल रात्री पाहुणे एकच्या सुमारास त्यांना हॉटेल चालू दिसले.
आतमध्ये पाहणी केली असता घरगुती सिलेंडर खाद्यपदार्थ बनविण्यासाठी वापरत आल्याचे त्यांच्या निदर्शनास आले. दोषारोपपत्र दाखल केल्यानंतर ऍड. साजीद शहा आणि ऍड. उमेश गवळी यांच्या युक्तीवादानंतर न्यायालयाने वरील आदेश दिला.