Pune Crime : पुणे शहरात किरकोळ वादातून एका तरुणाची निर्घृण हत्या झाल्याची धक्कादायक घटना समोर आली आहे. कॅम्प परिसरात मित्रांमध्ये झालेल्या वादातून ही घटना घडली असून मारहाणीचा सीसीटीव्ही व्हिडिओही सोशल मीडियावर व्हायरल झाला आहे. या प्रकरणी पोलिसांनी आतापर्यंत चार जणांना अटक केली असून इतर आरोपींचा शोध सुरू आहे. मिळालेल्या माहितीनुसार, फैसल फारुख खान असे मृत तरुणाचे नाव आहे. त्याचा आणि आरोपी शाहबाज शेख यांच्यात किरकोळ कारणावरून वाद झाला. दोघांमध्ये थट्टा-मस्करीवरून झालेल्या वादाचे रूपांतर मारहाणीत झाले. त्यानंतर शाहबाज शेख आणि त्याच्या साथीदारांनी मिळून फैसलवर धारदार शस्त्राने हल्ला केला. या हल्ल्यात फैसल खानच्या छातीवर, पाठीवर, हातावर आणि डोक्यावर वार करण्यात आले. गंभीर जखमी झालेल्या फैसलचा घटनास्थळीच मृत्यू झाला. या घटनेमुळे परिसरात एकच खळबळ उडाली आहे. या प्रकरणी बजाद अली सय्यद, अली अब्बास अश्रफअली सय्यद, सोहेल युसुफ तांबोळी, शाहबाज चांद शेख, तालिब अली सय्यद आणि अश्रफअली सय्यद यांच्याविरोधात गुन्हा दाखल करण्यात आला आहे. यापैकी चार जणांना पोलिसांनी अटक केली असून उर्वरित आरोपींचा शोध सुरू आहे. पोलिसांनी दिलेल्या माहितीनुसार, फैसल खानने आरोपी शाहबाज शेखची थट्टा केली होती. याचा राग आल्याने शाहबाजने त्याला चापट मारली. त्यातूनच दोघांमध्ये वाद वाढला आणि शाहबाज व त्याच्या साथीदारांनी एकत्र येत फैसलवर चाकूने हल्ला केला. दरम्यान, या घटनेचा सीसीटीव्ही व्हिडिओ समोर आला असून भररस्त्यात लोकांसमोर ही मारहाण होत असल्याचे त्यात दिसून येत आहे. काही नागरिकांनी भांडण सोडवण्याचा प्रयत्न केल्याचेही फुटेजमध्ये दिसत आहे. पोलिस या प्रकरणाचा अधिक तपास करत आहेत.
