येरवडा क्षेत्रीय कार्यालयात मोठी गर्दी येरवडा – येरवडा क्षेत्रीय कार्यालयाबाहेर अर्ज दाखल करण्यासाठी आलेले उमेदवार आणि कार्यकर्त्यांची मोठी गर्दी झाली होती. रात्री उशिरापर्यंत अर्ज दाखल करून घेण्याचे काम सुरू होते त्यामुळे किती जणानी अर्ज दाखल केले याची निश्चित आकडेवारी समजू शकली नाही. प्रभाग क्र. २ नागपूर चाळ-फुलेनगर व प्रभाग क्र. ६ येरवडा-गांधीनगर या प्रभागातील प्रमुख पक्षाच्या उमेदवारांनी अर्ज दाखल केले आहे. येरवडा, धानोरी, कळस क्षेत्रीय कार्यालयासमोर सकाळपासून उमेदवारी अर्ज भरण्यासाठी उमेदवारांनी गर्दी केली होती. उमेदवारी अर्ज भरण्यासाठी कोणत्या पक्षातून अर्ज दाखल केला, एबी फाॅर्म कुठुन भरला, नक्की भरला का, पॅनल कसा आहे. याची विचारणा एकमेकांकाना केली जात होती. एबी फाॅर्म उशीरा मिळाल्याने अशा उमेदवारांची अर्ज दाखल करण्यासाठी तांराबळ उडाली. गर्दीमुळे क्षेत्रीय कार्यालयाचे दरवाजे बंद करावे लागले. उमेदवार, सूचक, अनुमोदक यांना अर्ज भरण्यासाठी रांगा लावल्या होत्या. प्रत्येकाला दुपारी तीनच्या आत अर्ज दाखल करण्याची घाई होती. अर्ज भरल्यानंतर अनेक उमेदवारांनी फटाक्याच्या आतषबाजीत व पदयात्रा काढीत शक्ती प्रदर्शन केले. येरवडा क्षेत्रीय कार्यालयंतर्गत येणाऱ्या प्रभाग क्र. १ धानोरी-कळस, लोहगाव प्रभाग क्र.२ नागपूर चाळ-फुलेनगर तसेच प्रभाग क्र. ६ येरवडा-गांधीनगर या प्रभागातील उमेदवारांनी उमेदवारी अर्ज भरले. यात सर्वाधिक बंडखोरी भारतीय जनता पक्षात झाली. भाजपमधील अनेक निष्ठावंतांनी उमेदवारी न मिळाल्यामुळे इतर पक्षातून तिकिट मिळविले किंवा अपक्ष उभे राहिले आहेत.
