पुणे – “कोथरुड येथील मेट्रोशेड परिसरात लष्कराचे कुठल्याही प्रकारचे प्रशिक्षण केंद्र किंवा युनिट नाही, त्यामुळे संबंधित गोळीबार प्रकरणाशी लष्कराचा संबंध नाही,’ असे लष्करातर्फे स्पष्ट करण्यात आले आहे.
त्यामुळे आता “तो’ गोळीबार नेमका कोणी केला, याबाबतचे गूढ आणखी वाढले आहे. तर, “सापडलेल्या पुंगळ्यांची लॉंग डिस्टन्सची शस्त्रे ही फक्त लष्करातच वापरली जात असल्याचे सांगत आहेत. गुन्हेगार मोठ्या प्रमाणात देशी कट्ट्याचा वापर करतात. तरीही, सर्व शक्यता तपासून पाहिल्या जात आहेत,’ असे पोलीस सांगत आहेत.
कोथरुड येथील जुना कचरा डेपो येथे मेट्रो प्रकल्पाचे कारशेड आहे. संबंधित ठिकाणी बुधवारी सायंकाळी गोळीबार झाल्याची माहिती पोलिसांना मिळाली होती. त्यानंतर गुरुवारी दुपारी पुन्हा गोळीबार होऊन तेथे दोन ते तीन रिकामी काडतुसे आढळली. तर, मेट्रोच्या एका कर्मचाऱ्याच्या छातीलाही एक गोळी चाटून गेल्याचे महामेट्रो प्रशासनाने स्पष्ट केले होते. याविषयी लष्कर जनसंपर्क विभागाने अधिकृत प्रसिद्धी पत्रक जारी केले आहे.
या गोळीबारानंतर पोलिसांनी लष्कराशी पत्रव्यवहार केला आहे. तसेच, कोथरूड पोलीस ठाण्याच्या अधिकाऱ्यांनी टेकडीवर जाऊन पाहणी केली आहे. पत्राचे उत्तर मिळाल्यानंतर खरे कारण समोर येईल, तसेच तपासात मदत होईल. सापडलेल्या गोळ्या “एसएलआर’ किंवा “47′ रायफलमधून आल्या असण्याची शक्यता आहे.
– मेघश्याम डांगे, वरिष्ठ पोलीस निरीक्षक कोथरूड