pune accident: केसनंद गावाजवळ काल सायंकाळी चारच्या सुमारास झालेल्या अपघातानंतर किरण भोकरे आणि त्यांच्या ड्रायव्हरवर टोळक्याने हल्ला केल्याची धक्कादायक घटना घडली. या मारहाणीत ड्रायव्हरच्या डोक्याला गंभीर दुखापत झाली असून, संबंधित आरोपी थेऊरच्या दिशेने पळून गेल्याची माहिती जखमींकडून देण्यात आली आहे. मिळालेल्या माहितीनुसार, किरण भोकरे यांच्या वाहनाला समोरून येणाऱ्या काही व्यक्तींनी दारूच्या नशेत गाडी चालवत धडक दिली. अपघातानंतर नुकसानभरपाईची मागणी केली असता संतप्त झालेल्या टोळक्याने दगड आणि हातांनी दोघांनाही बेदम मारहाण केली. यात ड्रायव्हर गंभीर जखमी झाला. घटनेनंतर जखमींनी सायंकाळी साडेसहाच्या सुमारास लोणीकंद पोलीस ठाण्यात धाव घेतली. मात्र, त्यांना पहाटे चार वाजेपर्यंत बसवून ठेवण्यात आले आणि गुन्हा नोंदविण्यात आला नसल्याचा आरोप जखमींनी केला आहे. सकाळी जखमींच्या नातेवाईकांना “घटना हद्द वाघोलीची की लोणीकंदची, याची खात्री करावी लागेल,” असे सांगण्यात आल्याची माहितीही समोर आली आहे. दरम्यान, अद्याप आरोपींवर कोणतीही ठोस कारवाई झालेली नसल्याचे जखमींकडून सांगण्यात आले. या प्रकारामुळे स्थानिक नागरिकांमध्ये संताप व्यक्त होत असून, संबंधितांवर तातडीने गुन्हा दाखल करून कठोर कारवाई करण्याची मागणी होत आहे
