पुणे : अखिल भारतीय व्याघ्र अंदाज २०२६ अंतर्गत पुणे वनविभागात सुरू असलेल्या वन्यजीव सर्वेक्षणादरम्यान महाराष्ट्राचा राज्य प्राणी शेकरू (Indian Giant Squirrel) दिसल्याची नोंद झाली आहे. वाघ, बिबट्या व इतर वन्य प्राण्यांच्या अस्तित्वाच्या खुणांचा अभ्यास करून त्यांच्या अंदाजित संख्येचा आढावा घेण्यासाठी हे सर्वेक्षण १ जानेवारी २०२६ पासून पुणे वनविभागातील सर्व वनपरिक्षेत्रांत राबवले जात आहे. दिनांक ५ जानेवारी २०२६ रोजी सकाळी ७.४५ वाजता, मौजे आतवन येथील टायगर पॉईंट पर्यटनस्थळाजवळ ट्रान्झेक्ट लाईनवर प्राणी गणना सुरू असताना शेकरू दिसला. या वेळी उपस्थित असलेले वनपाल लोणावळा गणेश मेहेत्रे आणि वनरक्षक आतवन कृष्णा देठे यांनी शेकरू पाहिल्याची अधिकृत नोंद केली. शेकरू हा महाराष्ट्राचा राज्य प्राणी असून तो प्रामुख्याने उंच, घनदाट व जैवविविधतेने संपन्न जंगलांत आढळतो. त्यामुळे त्याची उपस्थिती ही त्या परिसरातील जंगल समृद्ध व पर्यावरणीयदृष्ट्या सक्षम असल्याचे द्योतक मानली जाते. उंच झाडांच्या शेंड्यावर वास्तव्य करणारा हा प्राणी बीजप्रसारास मदत करून जंगलाच्या पुनरुत्पादनात महत्त्वपूर्ण भूमिका बजावतो. जैवविविधतेबाबत सकारात्मक संकेत व्याघ्र अंदाज २०२६ अंतर्गत होत असलेल्या सर्वेक्षणात वाघ व बिबट्यांच्या खुणांसह इतर वन्यजीवांचेही निरीक्षण केले जाते. या पार्श्वभूमीवर पुणे वनविभागात शेकरूची नोंद झाली असल्याने या परिसरातील जैवविविधतेबाबत सकारात्मक संकेत मिळाले असून, अधिवासाच्या आरोग्याविषयी महत्त्वाची माहिती पुढे येण्याची अपेक्षा व्यक्त केली जात आहे. यापूर्वीही मावळ परिसरात शेकरू दिसून आलेला होता. लोणावळा परिसरातील जंगल हे पर्यटनाबरोबरच वन्यजीवांसाठी महत्त्वाचे अधिवासक्षेत्र असल्याचे या घटनेतून अधोरेखित झाले आहे. पुढील टप्प्यातील सर्वेक्षणातून संबंधित परिसरातील वन्यजीवांच्या स्थितीबाबत आणखी सविस्तर माहिती उपलब्ध होणार आहे.
