बँकॉक : थायलंडच्या निलंबित प्ंतप्रधान पेटोंग्टार्न शिनावात्रा यांनी मंत्रीपदाचा राजीनामा द्यावा, यामागणीसाठी राजधानी बँकॉकमध्ये आज उग्र निदर्शने करण्यात आली. कंबोडियाबरोबर झालेल्या संघर्,च्या पार्श्वभुमीवर थायलंडच्या लष्कराला पाठिंबा देण्यासाठी शिनावात्रा यांच्या राजीनाम्याची मागणी करण्यात येते आहे. थायलंड-कंबोडियादरम्यानच्या संघर्षात डझनभर लोक ठार झाले आणि अडीच लाखांपेक्षा जास्त लोकांना सुरक्षित ठिकाणी स्थलांतर करावे लागले आहे. राजधानी बँकॉकमधील व्हिक्टरी स्मारकाजवळ हजारोंच्या जनसमुदायाने शिनावात्रा यांच्या राजीनाम्याच्या मागणीसाठी जोरदार निदर्शने केली. यावेळी देशभक्तीपर गीतांचे गायनही केले गेले. निलंबित पंतप्रधान पेटोंग्टार्न शिनावात्रा आणि त्यांचे वडील माजी नेते थाकसिन शिनावात्रा यांच्या निषेधाची भाषणेही काही नेत्यांनी केली. देशात खऱ्या अर्थाने कायमच सत्ता आपल्या हातात ठेवणाऱ्या देशाच्या लष्कराला यावेळी पाठिंबा दिला गेला. जवळपास २ हजार निदर्शकांनी या निदर्शनांमध्ये भाग घेतला, असे पोलिसांनी सांगितले. पेटोंग्टार्न आणि त्यांच्या कुटुंबीयांनी कंबोडियाबरोबरचा संघर्ष होऊ दिल्याची टीका यावेळी करण्यात आली. कंबोडिया आणि थायलंडमध्ये अनेक दशकांपासून सीमावाद आहे. पण कंबोडियाचे नेते हून सेन यांचे शिनावात्रा कुटुंबाबरोबर असलेल्या जवळच्या संबंधांमुळे हा संघर्ष उफाळून आला, असा आरोप आहे. हून सेन आणि पेटोंग्टार्न शिनावात्रा यांच्या फोनवरील संभाषण काही दिवसांपुर्वी उघड झाले होते. त्यात शिनावात्रा या सेन यांना अंकल म्हणाल्या आणि थायलंडच्या लष्कराच्या जनरल पदावरील अधिकाऱ्याची त्यांनी बदनामीही केली होती. याचा जनतेमध्ये रोष आहे. न्यायालयाच्या आदेशानंतर शिनावात्रा यांना पंतप्रधानपदावरून निलंबित केले गेले. पण त्या थायलंडच्या मंत्रिमंडळातील मंत्री म्हणून कार्यरत आहेत.
