मुंबई : मुंबई महानगरपालिका निवडणुकीचा प्रभाग क्रमांक 3 भाजपला सोडल्याने नाराज शिवसैनिकांनी शिंदेसेनेचे आमदार प्रकाश सुर्वे यांना काळे झेंडे दाखवत, सुर्वे यांच्या विरोधात निदर्शने केली आहेत. प्रभाग क्रमांक 3 मध्ये प्रकाश सुर्वे यांनी प्रकाश पुजारी यांना तयारी करण्यासाठी सूचना दिल्या गेल्या होत्या. ऐनवेळी हा वॉर्ड भाजप नेते प्रविण दरेकर यांचे भाऊ प्रकाश दरेकर यांना सोडण्यात आला, यामुळे नाराज शिवसैनिकांनी प्रकाश सुर्वे यांच्या विरोधात निदर्शने केली. इच्छुक उमेदवार वैष्णवी पुजारी यांना डावलून बाहेरील उमेदवार भाजपाकडून लादण्यात आला आहे. याचा निषेध करण्यासाठी शिंदेसेनेचे शाखाप्रमुख प्रकाश पुजारी आणि त्यांच्या कार्यकर्त्यांकडून काळे झेंडे दाखवत आमदार प्रकाश सुर्वे आणि उमेदवार प्रकाश दरेकर यांचा निषेध नोंदविण्यात आला. यावेळी मोठ्या प्रमाणावर समर्थकांकडून घोषणाबाजी देखील करण्यात आली. आमदार सुर्वे यांच्या मुलाच्या उमेदवारीसाठी इतर मतदारसंघात तडजोड करावी लागल्यामुळे हा मतदारसंघ भाजपाला गेल्याचा दावा प्रकाश पुजारी यांच्याकडून करण्यात आला. सोबतच या ठिकाणी कार्यकर्त्यांना अंधारात ठेवून वरिष्ठ नेत्यांनी बाहेरच्या उमेदवाराला उमेदवारी जाहीर केल्याचे वैष्णवी पुजारी यांनी म्हटले आहे.
