पुणे – लायन्स क्लब ऑफ पुणे सुप्रीम, जिल्हा ३२३४-डी२ यांच्या वतीने ‘प्रोजेक्ट ब्राईट व्हिजन’ (दृष्टीहीनांसाठी स्मार्ट गॉगल) या पहिल्या प्रमुख उपक्रमाचे उद्घाटन नुकतेच पीवायसी हिंदू जिमखाना, पुणे येथे करण्यात आले. हा उपक्रम क्लब अध्यक्षा लायन संजना झामवर यांच्या नेतृत्वाखाली जयवंत साळवी फाउंडेशन यांच्या सहकार्याने राबविण्यात आला. कार्यक्रमाचे उद्घाटन जिल्हा राज्यपाल एमजेएफ लायन राजेश अग्रवाल यांच्या हस्ते झाले. यावेळी प्रथम उपजिल्हा राज्यपाल लायन श्रेयश दीक्षित आणि द्वितीय उपजिल्हा राज्यपाल लायन राजेंद्र गोयल, तसेच जयवंत साळवी फाउंडेशनचे विश्वस्त, मान्यवर पाहुणे आणि लायन्स बांधव उपस्थित होते. प्रोजेक्ट ब्राईट व्हिजन या उपक्रमाचा उद्देश कृत्रिम बुद्धिमत्तेवर आधारित दृष्टी सहाय्यक तंत्रज्ञानाच्या माध्यमातून दृष्टीहीन विद्यार्थ्यांना स्वावलंबी बनविणे व त्यांच्या जीवनमानात सकारात्मक बदल घडवून आणणे हा आहे. या कार्यक्रमात दृष्टीहीनांच्या कल्याणासाठी कार्य करणाऱ्या विविध संस्था व सामाजिक संघटनांचा सक्रिय सहभाग लाभला. यामध्ये एनएफबीएम जागृती अंध मुलींची शाळा, पुणे स्कूल अँड होम फॉर द ब्लाइंड – मुलींचे प्रशिक्षण केंद्र, कोथरूड, पुणे स्कूल अँड होम फॉर द ब्लाइंड – मुलांचे प्रशिक्षण केंद्र, पुणे, एकांश ट्रस्ट आणि कम्युनिटी आय केअर फाउंडेशन यांचा समावेश होता. नावीन्यपूर्ण संकल्पना आणि सर्वसमावेशक विकासासाठीच्या ठाम बांधिलकीमुळे या उपक्रमाचे सर्व स्तरातून कौतुक करण्यात आले.
