मुंबई : काँग्रेसचे ज्येष्ठ नेते आणि माजी मुख्यमंत्री पृथ्वीराज चव्हाण यांनी येत्या १९ डिसेंबरला देशात मोठा राजकीय भूकंप होणार असून मराठी माणूस पंतप्रधान होईल, असा खळबळजनक दावा केला होता. हा दावा अमेरिकेतील जेफ्री एपस्टीन प्रकरणाशी संबंधित फाइल्सच्या प्रकाशनाशी जोडला होता. मात्र १९ डिसेंबर उलटून गेल्यानंतरही पंतप्रधानपदी बदल झाला नाही, त्यामुळे चव्हाण यांना सोशल मीडियावर मोठ्या प्रमाणात ट्रोल करण्यात आले. २० डिसेंबरला साताऱ्यात पत्रकार परिषद घेऊन चव्हाण यांनी यावर स्पष्टीकरण दिले. मला ट्रोल करताय, याबाबत मला काहीच हरकत नाही. अमेरिकेत घडणाऱ्या घडामोडींवरून पुढच्या काही दिवसांत भारतीय राजकारणात मोठा परिणाम होईल, असं मी म्हटलं होतं, असं ते म्हणाले. चव्हाण यांनी एपस्टीन फाइल्सवर थेट सरकारला लक्ष्य करत म्हटलं की, जेफ्री एपस्टीन मोठं सेक्स रॅकेट चालवत होता आणि त्याची आत्महत्या की हत्या हे अजूनही गूढ आहे. जनतेच्या दबावामुळे अमेरिकन संसदेने एपस्टीन फाइल्स रिलीज केल्या. मोदी आणि एपस्टीनच्या नात्यावर सरकारने खुलासा करावा. फाइल्समध्ये केंद्रीय मंत्र्यांचंही नाव आलं आहे, पण सरकार खुलासा करत नाही किंवा आमचा यात संबंध नाही असंही म्हणत नाही, असा गंभीर आरोप चव्हाण यांनी केला. काय आहेत एपस्टीन फाइल्स? अमेरिकेतील कुख्यात गुन्हेगार जेफ्री एपस्टीनने जगभरातील प्रभावशाली व्यक्तींना अल्पवयीन मुली पुरवल्याचा आरोप आहे. या प्रकरणाशी संबंधित हजारो कागदपत्रे, ई-मेल्स आणि फोटो ‘Epstein Files Transparency Act’ अंतर्गत १९ डिसेंबर २०२५ पर्यंत सार्वजनिक करण्याची मुदत होती. अमेरिकन न्याय विभागाने काही फाइल्स रिलीज केल्या, मात्र पूर्ण आणि अनरेडॅक्टेड नसल्याने वाद निर्माण झाला आहे. चव्हाण यांचा मूळ दावा पिंपरी-चिंचवडमध्ये पुस्तक प्रकाशन प्रसंगी आला होता, यामध्ये त्यांनी अमेरिकेतील स्टिंग ऑपरेशन आणि इस्रायली गुप्तहेराच्या संदर्भात भारतात राजकीय उलथापालथ होईल, असं भाकीत केलं होतं. मात्र हे भाकीत खरं ठरलं नसल्याने ट्रोलिंग वाढली, तरी चव्हाण यांनी अमेरिकेतील घडामोडींवरून भारतीय राजकारणावर परिणाम होण्याची शक्यता कायम ठेवली आहे. या प्रकरणाने महाराष्ट्रासह देशाच्या राजकारणात नव्या चर्चेला तोंड फोडलं आहे.
