कराड : कराड दक्षिण विधानसभा मतदारसंघात दुबार-तिबार मतदार नोंदणी झाली असल्याचा दावा करून या प्रकरणात माजी मुख्यमंत्री आणि काँग्रेस नेते पृथ्वीराज चव्हाण यांचे कुटुंबीयच सामील असल्याचा आरोप भाजपकडून करण्यात आला आहे. कराडमध्ये भाजप पदाधिकार्यांनी शुक्रवारी पत्रकार परिषद आयोजित केली. यावेळी त्यांनी मतदार यादीतील पुरावे सादर करीत माजी मुख्यमंत्री पृथ्वीराज चव्हाण यांच्यावर निशाना साधला. भाजपचे तालुकाध्यक्ष धनाजी पाटील, शहराध्यक्ष सुषमा लोखंडे, माजी नगरसेवक सुहास जगताप, अतुल शिंदे आणि राजेंद्र यादव उपस्थित होते. सैदापूरचे उपसरपंच मोहनराव जाधव म्हणाले, 2014 आणि 2019 च्या निवडणुकांमध्ये या बनावट नोंदींचा वापर करून मतदान चोरी झाली. चव्हाण कुटुंबातील अनेक सदस्यांची नावे कराड दक्षिण आणि पाटण मतदार संघात आढळून आली आहेत. या नावांसाठी वेगवेगळे पत्ते, खोटे वय आणि चुकीची माहिती मतदार नोंदणी फॉर्ममध्ये दाखवण्यात आली आहे. इंद्रजित पंजाबराव चव्हाण हे 2024 च्या निवडणुकीत मुख्य निवडणूक प्रतिनिधी असून, वडिलांचे नाव व वय बदलून दोन मतदारसंघात नोंदणी, आशा इंद्रजीत चव्हाण – कराड येथे (वय 47), मलकापूरात 46, तर पाटण मतदारसंघात नाव आशाताई वय 44 अशी नोंद, शांतादेवी चव्हाण कराडमध्ये वय 87, मलकापूरात 86, तसेच अभिजीत इंद्रजीत चव्हाण मलकापूर येथे दोन वेगवेगळे पत्ते दाखवून नाव नोंदवले आहे. राहुल विजयसिंह चव्हाण पाटण कॉलनीत वय 53, तर कुंभारगावात वय 52, गौरी राहुल चव्हाण दोन ठिकाणी नोंदणी, वय बदलून, अधिकराव अण्णासाहेब चव्हाण दोन ठिकाणी नोंदणी, वडिलांचे नाव ‘अण्णासो’ आणि ‘अण्णासाहेब’ असे वेगवेगळे दाखवले आहे. मंगल अधिकराव चव्हाण दोन नोंदीत वयातील फरक, राजेश वसंतराव चव्हाण पाटण कॉलनीत वय 52, कुंभारगावात 56 असे कराड व पाटणमध्ये नऊ जणांची नावे, एकाच पत्त्यावर 15 मतदार आहेत. पृथ्वीराज चव्हाण यांच्या पाटण कॉलनी येथील घराच्या पत्त्यावर एकूण 15 मतदार नोंदवले गेले आहेत. मात्र, यातील बहुतांश लोक प्रत्यक्षात त्याठिकाणी राहत नाहीत. भाजपने निवडणूक आयोगाकडे औपचारिक तक्रार दाखल करण्याची आणि दोषींवर फौजदारी कारवाई करण्याची मागणी केली आहे. मतदार सत्यशोधन समितीचे नेतृत्व करणारे पृथ्वीराज चव्हाण यांच्याच कुटुंबीयांनी नियमांचे उल्लंघन केल्याचे समोर आले आहे. त्यामुळे हा प्रकार गंभीर असून तातडीने कारवाई करावी, अशी मागणी भाजप पदाधिकार्यांनी केली आहे.
