नवी दिल्ली – पंतप्रधान नरेंद्र मोदी यांनी पंतप्रधानपदाची शपथ घेतल्यानंतर आता प्रथमच ३० मार्च रोजी नागपूर येथील राष्ट्रीय स्वयंसेवक संघाच्या मुख्यालयाला ते भेट देऊ शकतात. पुढील महिन्यात होणाऱ्या भाजपच्या राष्ट्रीय अध्यक्षपदाच्या निवडणुकीपूर्वी पंतप्रधान मोदी नागपूरला जाणार आहेत. या निवडणुकीबाबत ते सरसंघचालक मोहन भागवत यांचाही सल्ला घेतील, अशी चर्चा आहे. नवीन भाजप अध्यक्षांबद्दल अटकळींचा बाजार गरम आहे. नवीन अध्यक्षाच्या नावावर संघ आणि भाजपमध्ये एकमत निर्माण करण्याचे प्रयत्न सुरू असल्याची चर्चा आहे.

नागपूर दौऱ्यादरम्यान, मोदी माधव नेत्रालयाच्या इमारतीच्या विस्ताराची पायाभरणी देखील करतील. याबाबत इन्स्टिट्यूट अँड रिसर्च सेंटरने सोमवारी एक निवेदन जारी केले आहे. यावेळी मोहन भागवत, मुख्यमंत्री देवेंद्र फडणवीस आणि केंद्रीय मंत्री नितीन गडकरी हे देखील या कार्यक्रमाला उपस्थित राहतील.

भाजप आणि संघ यांच्यातील संबंध

गेल्या वर्षीच्या लोकसभा निवडणुकीपूर्वी मोदी सरकार आणि राष्ट्रीय स्वयंसेवक संघ यांच्यातील संबंधांमध्ये कटुता निर्माण झाली होती. प्रत्यक्षात, भाजप अध्यक्ष जेपी नड्डा यांनी निवडणुकीदरम्यान १७ मे रोजी म्हटले होते की, त्यांना अटलबिहारी वाजपेयी आणि पंतप्रधान मोदी यांच्या पंतप्रधानपदाच्या काळात भाजप आणि आरएसएसमधील संबंधांमध्ये झालेल्या बदलाबद्दल प्रश्न विचारण्यात आले. त्यावर ते म्हणाले होते की, एके काळी भाजपाला संघाची फार मोठी गरज होती. मात्र, आता संघाशिवायही अनेक कामे केली जाऊ शकतात.याचाच अर्थ पक्षाचे संघावरील अवलंबित्व पूर्वीच्या तुलनेत कमी झाले आहे. नड्डा यांच्या या विधानानंतर असे मानले जात होते की, भाजप आणि आरएसएसमधील संबंध आता सामान्य राहिलेले नाहीत.

नरेंद्र मोदी आणि संघ

लोकसभा निवडणुकीत भाजपला आपले ४०० जागांचे लक्ष्य गाठता आले नाही. त्यांना नितीश कुमार यांच्या जेडीयू आणि चंद्राबाबू नायडू यांच्या टीडीपीच्या पाठिंब्याने सरकार स्थापन करावे लागले. भाजपच्या खराब कामगिरीचे कारण संघाचे नेते आणि कार्यकर्त्यांचे प्रचारापासूनचे अंतर मानले जात होते. लोकसभा निवडणुकीनंतर दोघांमधील संबंध सुधारले. याचा परिणाम हरियाणा आणि महाराष्ट्राच्या विधानसभा निवडणुकांवर झाला. दोन्ही राज्यांमध्ये भाजपला सरकार स्थापन करण्यात यश आले.

जर पंतप्रधान मोदी ३० मार्च रोजी संघ मुख्यालयाला भेट देत असतील, तर त्यांचे हे पाऊल आरएसएसच्या वरिष्ठ नेत्यांशी असलेले मतभेद दूर करण्याचा प्रयत्न असू शकते. यापूर्वी, सप्टेंबर २०१५ मध्ये पंतप्रधान मोदी आणि राष्ट्रीय स्वयंसेवक संघाच्या वरिष्ठ नेत्यांमध्ये बैठक झाली होती. पंतप्रधान मोदी आणि आरएसएस प्रमुख भागवत दिल्लीत भाजप आणि संघाच्या वरिष्ठ नेत्यांच्या समन्वय समितीच्या बैठकीला उपस्थित होते.