Satara: उत्तर भारतीय समाजाच्या श्रद्धेचे प्रतीक असलेल्या छठ महापर्वानिमित्त साताऱ्यातील संगम माहुली येथील घाटावर धार्मिक कार्यक्रमाचे आयोजन करण्यात आले आहे. रविवारी (दि. १५) आणि सोमवारी (दि. १६) होणाऱ्या या उत्सवासाठी पूर्वांचलसह उत्तर प्रदेश, बिहार आणि झारखंडमधील नागरिकांनी तयारी सुरू केली आहे. या सोहळ्यास सातारा शहर व परिसरातील सुमारे चार ते पाच हजार भाविक उपस्थित राहण्याचा अंदाज आहे. या कार्यक्रमाचे आयोजन शिक्षण मंडळाचे माजी सभापती राम हादगे, अनिल कुमार शाह, सुदेश गुप्ता, श्रवण गुप्ता, मुन्ना शाह आणि मित्र परिवाराच्यावतीने करण्यात आले आहे.

छठ महापर्वात सूर्योपासनेला विशेष महत्त्व असून, या पर्वात मावळत्या आणि उगवत्या सूर्याला अर्ध्य अर्पण करून भक्तिभावाने पूजा केली जाते. त्यानुसार रविवारी सायंकाळी संगम माहुली घाटावर मावळत्या सूर्याला संध्या अर्ध्य अर्पण करण्यात येणार आहे. तर सोमवारी पहाटे चार वाजल्यापासून भाविक घाटावर जमणार असून, उगवत्या सूर्याला उषा अर्ध्य अर्पण करून धार्मिक विधींची सांगता होणार आहे.

या कार्यक्रमाला खासदार उदयनराजे भोसले उपस्थित राहणार आहेत. कार्यक्रमाला महिला आणि लहान मुलांची मोठ्या प्रमाणावर उपस्थिती राहणार असल्याने भाविकांच्या सुरक्षिततेसह स्वच्छता आणि मूलभूत सुविधांचा प्रश्न महत्त्वाचा ठरणार आहे. या पार्श्वभूमीवर आयोजकांनी सातारा नगरपरिषदेच्या मुख्याधिकाऱ्यांकडे निवेदन देऊन आवश्यक सुविधांची मागणी केली आहे. यामध्ये मोबाइल टॉयलेटची व्यवस्था, स्वच्छता कर्मचाऱ्यांमार्फत घाट परिसराची स्वच्छता, जंतुनाशक फवारणी तसेच पिण्याच्या पाण्यासाठी तीन छोटे टँकर उपलब्ध करून देण्याची मागणी करण्यात आली आहे. रविवारी दुपारी तीन वाजल्यापासून कार्यक्रम संपेपर्यंत आणि सोमवारी पहाटे चार ते सकाळी आठ या वेळेत या सुविधा उपलब्ध करून देण्याची विनंती करण्यात आली आहे.

संगम माहुली घाटावर दरवर्षी उत्साहात होणाऱ्या या पर्वाच्या निमित्ताने उत्तर भारतीय समाजातील नागरिक एकत्र येतात. यंदाही हजारो भाविकांच्या सहभागातून सूर्योपासनेचा हा धार्मिक सोहळा भक्तिमय वातावरणात पार पडण्याची अपेक्षा आहे. आता नगरपरिषदेकडून मागणी केलेल्या सुविधांची पूर्तता कितपत केली जाते, याकडे आयोजक आणि भाविकांचे लक्ष लागले आहे.