Preity Zinta: बॉलिवूड अभिनेत्री प्रीती झिंटा  (Preity Zinta)आपल्या अभिनयासोबतच वैयक्तिक आयुष्य आणि कामाच्या जबाबदाऱ्या सांभाळण्यासाठीही ओळखली जाते. लग्न आणि आई झाल्यानंतर तिने काही काळ चित्रपटांपासून अंतर घेतलं होतं. या काळात तिने आपल्या कुटुंबासोबतच व्यवसायावरही लक्ष दिलं. आता पुन्हा अभिनयाच्या क्षेत्रात सक्रिय झाल्यानंतर प्रीतीने मदरहूड आणि करिअर यांच्यातील समतोलाबाबत मनमोकळेपणाने भाष्य केलं आहे.

प्रीतीच्या मते, महिला स्वभावानेच मल्टीटास्किंग असतात. त्या एकाच वेळी अनेक जबाबदाऱ्या सांभाळू शकतात. आपल्या आईचं उदाहरण देताना प्रीतीने सांगितलं की, तिची आई नोकरी करत नसली तरी घर आणि कुटुंब सांभाळणं हे एखाद्या फुलटाइम जॉबपेक्षा कमी नव्हतं.  (Preity Zinta)

तिच्या आईने पती, तीन मुलं, घर आणि इतर अनेक जबाबदाऱ्या सांभाळल्या. त्यामुळे घराची जबाबदारी सांभाळणाऱ्या महिलांचं काम किती मोठं असतं, याची जाणीव आपल्याला लहानपणापासूनच असल्याचं प्रीतीने सांगितलं. आजच्या काळात अनेक महिला घर आणि ऑफिस या दोन्ही जबाबदाऱ्या सांभाळत आहेत. त्यामुळे त्या कोणत्याही ‘सुपरवुमन’पेक्षा कमी नाहीत, असंही ती म्हणाली.

करिअर आणि मदरहूड सांभाळणं सोपं नाही   (Preity Zinta)

प्रीतीने स्वतःला भाग्यवान म्हटलं आहे. कारण तिच्या आयुष्यात एक मजबूत सपोर्ट सिस्टम आहे. या मदतीमुळे तिला वैयक्तिक आणि व्यावसायिक आयुष्याचा समतोल साधता येतो. प्रीतीने स्पष्टपणे सांगितलं की, जर तिला ही मदत मिळाली नसती तर कामासाठी घराबाहेर पडणंही तिच्यासाठी कठीण झालं असतं. मुलं, घर आणि करिअर या सगळ्या गोष्टी एकाच वेळी सांभाळताना मदतीची गरज असते. योग्य सुविधा आणि कुटुंबाचा किंवा इतरांचा आधार मिळाला तर महिलांसाठी हे सगळं व्यवस्थापित करणं तुलनेने सोपं होऊ शकतं.

प्रत्येक टप्प्यावर बदलते प्राधान्य  (Preity Zinta)

आयुष्यात अनेक गोष्टी साध्य करायच्या असतील तर प्रत्येक गोष्ट एकाच वेळी करता येत नाही. वेगवेगळ्या काळात वेगवेगळ्या गोष्टींना प्राधान्य द्यावं लागतं, असं प्रीतीचं म्हणणं आहे. तिच्या मते, आयुष्याच्या एका टप्प्यावर कुटुंब महत्त्वाचं ठरू शकतं, तर दुसऱ्या टप्प्यावर करिअर किंवा इतर जबाबदाऱ्यांना जास्त वेळ द्यावा लागू शकतो. हा प्रवास नेहमीच सोपा नसतो. मात्र, योग्य साधनं, सुविधा आणि मदत मिळत असेल तर अनेक अडचणी कमी होऊ शकतात.

मदतीशिवाय सर्व काही सांभाळणाऱ्या महिलांचं कौतुक   (Preity Zinta)

प्रीतीने अशा महिलांचंही कौतुक केलं ज्या कोणत्याही मोठ्या मदतीशिवाय नोकरी, घर आणि मुलांची जबाबदारी एकाच वेळी सांभाळतात. प्रत्येक महिलेची परिस्थिती वेगळी असते आणि प्रत्येकाकडे उपलब्ध असलेली मदतही वेगळी असते.

ज्यांना घरातून किंवा इतरांकडून फारशी मदत मिळत नाही, त्यांच्यासाठी हा प्रवास आणखी कठीण असतो. त्यामुळे आपल्या आयुष्यात उपलब्ध असलेल्या सुविधा आणि निर्णय घेण्याचं स्वातंत्र्य याबद्दल प्रीतीने कृतज्ञता व्यक्त केली.

प्रीती झिंटाचं हे वक्तव्य केवळ तिच्या वैयक्तिक अनुभवाबद्दल नाही, तर करिअर आणि कुटुंब यांच्यात समतोल साधणाऱ्या अनेक महिलांच्या आयुष्यावरही प्रकाश टाकतं. घर आणि काम दोन्ही सांभाळताना महिलांना केवळ कौतुकाची नाही, तर योग्य आधार आणि सहकार्याचीही गरज असते, हा महत्त्वाचा मुद्दा तिने अधोरेखित केला आहे.