भुवनेश्‍वर : 18 व्या प्रवासी भारतीय दिवस अधिवेशनाला आजपासून ओडिशातील भुवनेश्‍वर येथे प्रारंभ झाला. परराष्ट्र मंत्री एस. जयशंकर यांनी अनिवासी भारतीयांना आणि मूळ भारतीय समुदायाला विकसित भारताच्या निर्मितीमध्ये सहभागी होण्याचे आवाहन केले. भारतातील पर्यटन स्थळांना प्रोत्साहन द्यावे, असेही त्यांनी यावेळी सुचवले.

तरुणांची पूर्ण क्षमता साध्य करण्यासाठी त्यांच्यामध्ये गुंतवणूक करणे महत्त्वाचे आहे, असे सांगताना जयशंकर यांनी विकसित भारताचे उद्दिष्ट साध्य करण्यासाठी सुरू करण्यात आलेल्या विविध उपक्रमांमध्ये सहभागी व्हावे. भारत देश एक आधुनिक, सर्वसमावेशक आणि प्रगतीशील समाज निर्माण करण्यासाठी दीर्घकालीन आव्हानांचा सामना करत सर्वात मोठा लोकशाही देश म्हणून यशस्वीपणे प्रवास करत आहे, असे प्रतिपादन देखील त्यांनी यावेळी केले.

जयशंकर, युवा व्यवहार आणि क्रीडा मंत्री मनसुख मांडविया आणि मुख्यमंत्री मोहन चरण माळी यांच्या हस्ते युवा प्रवासी भारतीय दिवसाच्या उद्घाटनाने संमेलनाची सुरुवात झाली. पंतप्रधान नरेंद्र मोदी गुरुवारी उद्घाटन सत्रात भाग घेतील, तर अध्यक्ष द्रौपदी मुर्मू शुक्रवारी समापन सत्राचे अध्यक्षस्थान करतील, असे अधिकाऱ्यांनी सांगितले.

त्रिनिदाद आणि टोबॅगोच्या अध्यक्षा क्रिस्टीन कार्ला कांगालू या विकसित भारतासाठी डायस्पोराचे योगदान या थीमवर आयोजित या आवृत्तीच्या प्रमुख पाहुण्या आहेत. त्या अधिवेशनाला आभासी माध्यमातून संबोधित करणार आहेत. या अधिवेशनाला ७५ देशांमधूल ६ हजारांपेक्षा अधिक अनिवासी भारतीय आणि मूळ भारतीय वंशाचे नागरिक उपस्थित आहेत.