१. ज्येष्ठ शिल्पकार राम सुतार यांचे निधन ज्येष्ठ शिल्पकार राम सुतार यांचे वयाच्या 101व्या वर्षी निधन झाले. नोएडा येथील राहत्या घरी रात्री 1.30 वाजता त्यांची प्राणज्योत मालवली. आज सकाळी ११ वाजता गुरुग्राममध्ये त्यांच्यावर अंत्यसंस्कार करण्यात येणार आहेत. राम सुतार यांनी जगभरात २०० हून अधिक पुतळे बनवले आहेत. त्यामध्ये ‘स्टॅच्यू ऑफ युनिटी’ हा सरदार वल्लभभाई पटेल यांचा सर्वांत उंच पुतळा उभारणीचे काम सुद्धा त्यांनी केले आहे. ५२२ फूट उंच पुतळा एवढा मोठा पुतळा जगातील एकमेव आहे. त्यांना पद्मश्री पुरस्काराने सन्मानित करण्यात आले होते. काही दिवसांपूर्वीच त्यांना ‘महाराष्ट्र भूषण’ या पुरस्काराने सन्मानित करण्यात आले होते. २. भाजप प्रवेश निश्चित! प्रज्ञा सातव यांनी दिला आमदारकीचा राजीनामा काँग्रेसच्या आमदार प्रज्ञा सातव यांचा भाजप पक्षात प्रवेश निश्चित झाल्याची चर्चा आहेआज त्यांनी काँग्रेसच्या विधान परिषदेच्या आमदारकीचा राजीनामा दिला आहे. त्यांनी आज विधिमंडळाच्या सचिवांकडे आपला राजीनामा दिला आहे. आमदारकीचा राजीनामा दिल्यानंतर त्या भाजपमध्ये प्रवेश करणार आहेत. यामुळे हिंगोलीतील राजकीय समीकरणे बदलण्याची शक्यता वर्तवली जात आहे. ३. लिओनेल मेस्सीची भारतीयांसाठी खास पोस्ट स्टार फुटबॉलपटू लिओनेल मेस्सी नुकताच भारतात येऊन गेला. त्याच्या भारत दौऱ्यादरम्यान त्यानं दिल्ली, मुंबई, हैदराबाद व कोलकाता या शहरांना भेटी दिल्या. भारत दौऱ्याच्या शेवटच्या दिवशी मेस्सीनं अनंत अंबानी यांच्यासह वनतारा प्रकल्पाला भेट दिली. हा संपूर्ण दौरा करून मायदेशी परतलेल्या मेस्सीनं भारतीयांसाठी खास पोस्ट शेअर केली आहे. या पोस्टमध्ये त्यानं भारतीयांचे आभार मानले आहेत. तसेच, भारतातील फुटबॉल अधिक समृद्ध व्हावं यासाठी शुभेच्छा देखील दिल्या. ४. कोकाटेंचा राजीनाम्यानंतर संजय शिरसाटांच्या विकेटची वाट पाहतोय – रोहित पवार राष्ट्रवादीचे नेते माणिकराव कोकाटे यांच्या अटकेची शक्यता वाढल्यानंतर अखेर त्यांनी क्रीडमंत्री पदाचा राजीनामा दिला आहे. मुख्यमंत्री देवेंद्र फडणवीस यांच्या शिफारशीवरून राज्यपालांनी त्यांच्या राजीनाम्याला मान्यता दिली आहे. यानुसार, कोकाटे यांच्याकडील सर्व खाती तात्पुरत्या स्वरूपात अजित पवार यांच्याकडे वर्ग करण्यात आली आहे. यातच आता शरद पवार गटाचे आमदार रोहित पवार यांनी आणखी एका बड्या मंत्र्याच्या विकेटची पाहत असल्याचे म्हणत सामाजिक न्यायमंत्री संजय शिरसाट यांच्यावर निशाणा साधला आहे. ५. महाराष्ट्रातील सर्व विमानांमध्ये मराठी भाषेत उद्घोषणा करावी – पटोले सध्या विमानांमध्ये हिंदी व इंग्रजी भाषेतच उद्घोषणा केली जाते. मात्र, महाराष्ट्र ही मराठी भाषेची भूमी असून मराठी ही राज्याची राजभाषा आहे. त्यामुळे राज्यातील प्रमुख विमानतळांवर उतरणाऱ्या व उड्डाण करणाऱ्या सर्व विमानांमध्ये मराठी भाषेतील उद्घोषणा अनिवार्य करण्यात यावी, अशी मागणी काँग्रेसचे माजी प्रदेशाध्यक्ष व आमदार नाना पटोले यांनी केली आहे. यासंदर्भात नाना पटोले यांनी पंतप्रधान नरेंद्र मोदी यांना पत्र पाठवले आहे. ६. ‘…तर युक्रेनचा आणखी भाग बळकावू ‘- व्लादिमीर पुतीन रशियाच्या संरक्षण मंत्रालयाच्या बैठकीत बोलताना व्लादिमीर पुतीन यांनी युरोपीय नेत्यांचा उल्लेख डुकरांची पिले असा केला. पश्चिमेकडील देश जाणीवपूर्वक रशियाविरोधात भीतीचे वातावरण तयार करत आहेत, जर कीव अर्थात युक्रेन आणि त्याचे पश्चिमेकडील समर्थकांनी अमेरिकेचा पाठिंबा असलेल्या शांतता प्रस्तावावर चर्चा केली नाही. तर मॉस्को ताकदीचा वापर करून युक्रेनचा आणखी भाग ताब्यात घेईल, असा थेट इशारा व्लादिमीर पुतीन यांनी दिला आहे. ७. नव्या वर्षात दिलासा! सीएनजी, घरगुती पीएनजी स्वस्त सीएनजी आणि घरगुती पीएनजी यांच्या किमतीत प्रति युनिट २ ते ३ रुपये कपात होणार असल्याने देशभरातील नागरिकांना दिलासा मिळणार आहे. पेट्रोलियम व नैसर्गिक वायू नियामक मंडळाने जाहीर केलेली नवी दर रचना १ जानेवारी २०२६ पासून लागू होणार आहे. पीएनजीआरबीचे सदस्य ए. के. तिवारी यांनी, नव्या एकत्रित दर रचनेत राज्य व कर रचना यानुसार ग्राहकांची बचत होईल. यासाठी दर झोनची संख्या तीनवरून दोन करण्यात आली आहे, असे सांगितले. ८. रिझर्व्ह बँकेत परीक्षेशिवाय नोकरी मिळणार रिझर्व्ह बँकेत कोणत्याही परीक्षेशिवाय नोकरी मिळणार आहे. रिझर्व्ह बँकेने लेटरल रिक्रूटमेंटसाठी नोटिफिकेशन जारी केले आहे. रिझर्व्ह बँकेतील या नोकरीसाठी अर्जप्रक्रिया १७ डिसेंबर २०२५ पासून सुरु झाली आहे. या नोकरीसाठी अर्ज करण्याची शेवटची तारीख ६ जानेवारी २०२५ आहे. त्यामुळे इच्छुकांनी मुदतीपूर्वी अर्ज करायचे आहेत. रिझर्व्ह बँकेत एकूण ९३ पदांसाठी भरती करण्यात येणार आहे. ग्रेड सी पदांसाठी ही भरती असणार आहे. रिझर्व्ह बँकेतील या नोकरीसाठी पात्रता पदानुसार वेगवेगळी असणार आहे. ९. वडिलांनी घेतलेल्या कर्जाचे लेकानं पांग फेडलं आयपीएल २०२६ साठी मंगळवारी २६ डिसेंबर रोजी लिलाव झाला. या आयपीएल लिलावात शहापूरच्या ओंकार टरमेळेची वर्णी लागली आहे. ठाण्याची शहापूरमधील ओंकारला सनरायझर्स हैदराबादने ३० लाखांच्या मूळ किंमतीत खरेदी केले आहे. त्याने आतापर्यंत अनेक स्तरावर आपले कौशल्य दाखवले आहे. तो त्याच्या वेगवान गोलंदाजीसाठी ओळखला जातो. ओंकारची घरची बेताची परिस्थिती आहे. ओंकारच्या क्रिकेटसाठी त्याच्या वडिलांनी लोन देखील घेतले होते. मात्र मेहनेतीच्या जोरावर त्याने मोठं यश मिळवले आहे. सध्या त्याचे सर्वत्र कौतुक केले जात आहे. १०. डिनो मोरियाच्या वडिलांचे निधन प्रसिद्ध अभिनेता डिनो मोरियाच्या वडिलांचे दुःखद निधन झाले आहे. त्यामुळे मनोरंजसृष्टीवर शोककळा पसरली आहे. डिनो मोरियाच्या वडिलांचे नाव रॉनी मोरिया आहे. सोशल मिडियावर डिनो मोरियाने एक भावुक पोस्ट शेअर केली आहे. त्याने पोस्टमध्ये वडिलांसोबतचे जुने फोटो आणि व्हिडीओ शेअर केले आहेत माझे मार्गदर्शक, माझे नायक, माझे वडील, बाबा!! बाबा, आयुष्यातील धड्यांसाठी धन्यवाद!! आम्हा सर्वांना तुमची खूप आठवण येईल, असे म्हणत त्याने भावना व्यक्त केल्या आहेत.
