Polymer Notes :  भारतीय रिझर्व्ह बँकेचे गव्हर्नर संजय मल्होत्रा यांनी बुधवारी सांगितले की, पुढील आर्थिक वर्षाच्या सुरुवातीला दीर्घकाळ टिकणार्‍या पॉलिमर नोटा चलनात आणण्याचे त्यांचे लक्ष्य आहे.

पतधोरण आढाव्यानंतर पत्रकारांशी बोलताना मल्होत्रा म्हणाले की, काही देशांमध्ये पॉलिमर नोटा 30 वर्षांहून अधिक काळ टिकल्या आहेत आणि त्या विशेषतः कमी मूल्याच्या नोटांसाठी उपयुक्त ठरतील. जर सर्व काही योजनेनुसार झाले, तर पुढील आर्थिक वर्षाच्या सुरुवातीला त्या चलनात आणण्याचे आमचे लक्ष्य आहे.

मल्होत्रा म्हणाले की, व्याजदरांसारख्या महत्त्वाच्या बाबींवर भारतीय रिझर्व्ह बँकेची (आरबीआय) पुढील भूमिका ही उपलब्ध माहितीवर अवलंबून असेल. मध्यम मुदतीत महागाईचा दर 4 टक्क्यांच्या लक्ष्याशी जुळवून घेणे, हे बँकेचे मुख्य उद्दिष्ट आहे. परकीय चलन अनिवासी (बँक) योजनेवर भाष्य करताना, मल्होत्रा म्हणाले की निधीचा ओघ मजबूत राहिला आहे आणि मर्यादित कालावधीची ही योजना संपेपर्यंत निधी चांगला मिळेल अशी आरबीआयला अपेक्षा आहे.

परदेशातून निधी वाढला –

निधीच्या ओघासाठी आरबीआयला खर्च सोसावा लागणार असल्याने, मध्यवर्ती बँक ही योजना मुदतपूर्व बंद करण्याचा विचार करत आहे का, असे विचारले असता, मल्होत्रा म्हणाले की, सध्या तरी असा कोणताही प्रस्ताव नाही.

परदेशातून मोठ्या प्रमाणात निधीचा ओघ असूनही रुपया अपेक्षेप्रमाणे मजबूत झाला नाही, हे निदर्शनास आणून दिल्यावर, मल्होत्रा म्हणाले की, भू-राजकीय तणाव कमी झाल्यास रुपया आणखी मजबूत होऊ शकतो. रुपयाची वाटचाल सुव्यवस्थित राहावी, हा आरबीआयचा प्रयत्न असेल, असेही ते म्हणाले.