पिंपरी – पिंपरी-चिंचवड महापालिकेच्या निवडणुका अगदी वर्षावर येऊन ठेपल्या आहेत. निवडणुकीच्या पार्श्वभूमीवर पिंपरी, चिंचवड आणि भोसरी विधानसभा मतदारसंघात इच्छुक उमेदवारांकडून कार्यक्रमांची रेलचेल सुरू आहे. जनतेच्या सुरक्षेच्या अनुषंगाने उपाययोजना करण्यासाठी सीसीटीव्ही बसविण्याचा उपक्रम राजकीय नेत्यांकडून सुरू झाला आहे. मात्र, हे सीसीटीव्ही जनतेच्या सुरक्षेसाठी की, विरोधकांच्या घडामोडींवर करडी नजर ठेवण्यासाठी, असा प्रश्न नागरिकांनी उपस्थित केला आहे. तर दुसरीकडे पोलिसांनी मात्र सीसीटीव्ही उपक्रमांचे स्वागत केले आहे. महापालिका क्षेत्रात निवडणुकांची रणधुमाळी आतापासूनच रंगू लागली आहे. विरोधी पक्षातील वजनदार माणसांना आपल्या पक्षात आणण्यासाठी प्रमुख पक्षांचे सर्वच नेते चढाओढीला लागले आहेत. निवडणुकीच्या पार्श्वभूमीवर विद्यार्थ्यांचा गुणगौरव, हळदीकुंकू तसेच विविध स्पर्धा, आरोग्य तपासणी असे गर्दीचे उपक्रम सुरू आहेत. निवडणुकीत परिसरातील मतदारांना आकर्षत करण्यासाठी सुरक्षेचे कारण पुढे करत सीसीटीव्ही बसविण्याचा सपाटा सध्या अनेक प्रभागांत सुरू आहे. सीसीटीव्ही बसविण्याच्या कामांचा शुभारंभ, सीसीटीव्हीचे लोकार्पण असे नवे कार्यक्रम उमेदवारांकडून राबविले जात आहेत. मात्र प्रभागांमध्ये बसविण्यात येणारे सीसीटीव्ही हे पोलिसांच्या निगराणी खाली नाही तर बसविणाऱ्या राजकीय नेत्यांच्या नजरेखाली असणार आहेत. मात्र, एखादी गुन्हेगारी घटना घडल्यास या फुटेजच्या माध्यमातून तपासाला दिशा मिळू शकते. तसेच परिसरातील चुकीच्या घडमोडींना लगाम बसणार असला तरी, विरोधकांच्या हालचाली मात्र सहजतेने सीसीटीव्हीत कैद होणार आहेत. त्यामुळे विरोधकांना देखील सावधगिरीने निवडणुकीत सीसीटीव्हीच्या रेंजमध्ये वावरावे लागणार आहे. निवडणुकांनंतर हे सीसीटीव्ही राहतील का नाही हा प्रश्न मात्र अधांतरीच आहे. दरम्यान पोलिसांनी सीसीटीव्ही बसविण्याच्या प्रकाराबाबात नियम आणि अटी लागू केल्या नसल्या तरी ज्यांनी सीसीटीव्ही बसवले आहेत. त्यांनी समाजविघातक कृत्यासाठी किंवा स्वतःच्या चढाओढीसाठी वापर करू नये, असे आवाहन पोलिसांनी केले आहे.
