Political News : महाराष्ट्राच्या राजकीय वर्तुळातून ‘ऑपरेशन टायगर’ संदर्भात आणखी एक अत्यंत धक्कादायक आणि मोठी अपडेट (Political News) समोर येत आहे. शिवसेना ठाकरे गटाच्या ६ बंडखोर खासदारांना सुरक्षेच्या कारणास्तव थेट दिल्लीतून हलवण्यात आले असून, त्यांना उत्तर भारतातील एका अज्ञात राज्यात सुरक्षित स्थळी (रिसॉर्ट पॉलिटिक्स) नेण्यात आल्याची माहिती सूत्रांनी दिली आहे.

वर्ष २०२२ मधील आमदारांच्या बंडावेळी सर्वांना आसाममधील ‘गुवाहाटी’ला नेण्यात आले होते, मात्र यावेळी खासदारांच्या सुरक्षेसाठी गुवाहाटीऐवजी दुसऱ्या राज्याची निवड करण्यात आली असून याबाबत कमालीची (Political News) गुप्तता बाळगली जात आहे. हे सर्व बंडखोर खासदार शिवसेना ठाकरे गटाच्या वर्धापन दिनी, म्हणजेच १९ जून रोजी थेट मुंबईत दाखल होणार असल्याचे समजते.

या संपूर्ण मोठ्या घडामोडींमध्ये धाराशिवचे खासदार ओमराजे निंबाळकर हे इतर बंडखोरांसोबत नसून ते सध्या पुण्यात दाखल झाले आहेत, ज्यामुळे त्यांच्या भूमिकेकडे सर्वांचे लक्ष लागले आहे. मुख्यमंत्री एकनाथ शिंदे यांनी ‘ऑपरेशन टायगर’च्या माध्यमातून उद्धव ठाकरेंना हा आतापर्यंतचा सर्वात मोठा धक्का दिला असून, ठाकरे गटाच्या ९ लोकसभा खासदारांपैकी ६ खासदार अधिकृतपणे एकनाथ शिंदेंच्या शिवसेनेत (शिंदेसेना) प्रवेश करण्याच्या जोरदार हालचाली सुरू आहेत.

या सर्व राजकीय भूकंपाच्या पार्श्वभूमीवर, ठाकरे गटातील उर्वरित निष्ठावंत खासदारांची (Political News) भूमिका देखील आता स्पष्ट झाली आहे. नाशिकचे खासदार राजाभाऊ वाजे आणि ईशान्य मुंबईचे खासदार संजय दिना पाटील यांनी आपण कोणत्याही पक्षात जाणार नसल्याचे जाहीर करत बंडखोरीच्या चर्चांना पूर्णविराम दिला आहे. त्यामुळे राजाभाऊ वाजे आणि संजय दिना पाटील यांच्यासह ज्येष्ठ नेते अनिल देसाई आणि दक्षिण मुंबईचे खासदार अरविंद सावंत हे चौघे जण उद्धव ठाकरेंसोबतच ठाम राहणार असल्याचे स्पष्ट झाले आहे.

आपल्यावरील संशयावर स्पष्टीकरण देताना नाशिकचे खासदार राजाभाऊ वाजे म्हणाले की, “मी उद्धव साहेबांसोबतच आहे आणि कायम त्यांच्यासोबतच राहीन. माझा इतर कोणाशीही संपर्क झालेला नाही आणि मला मुख्यमंत्री एकनाथ शिंदे यांच्याकडून कोणताही फोन आलेला नाही किंवा त्यांनी तसा प्रयत्नही केला नाही. मी पक्षात कुठेही नाराज नसून केवळ एका शासकीय समितीच्या बैठकीसाठी दिल्लीत आलो आहे.”

तर दुसरीकडे खासदार संजय दिना पाटील यांनीही अत्यंत मोजक्या शब्दांत आपली भूमिका मांडताना स्पष्ट केले की, “मी कुठल्याही दुसऱ्या पक्षात चाललो नाही, उद्यापर्यंत या सर्व अफवांचे चित्र पूर्णपणे स्पष्ट होईल.” त्यामुळे आता १९ जून रोजी शिवसेनेच्या वर्धापन दिनाला मुंबईत नेमका काय धमाका होतो, याकडे संपूर्ण देशाचे डोळे लागले आहेत.