प्रभात वृत्तसेवा पुणे – महापालिका निवडणुकीसाठी १५ जानेवारीला मतदान होत असून पुणे, पिंपरी-चिंचवडमध्ये मतपेट्या वाहून नेण्यासाठी निवडणूक आयोगाने पुणे महानगर परिवहन महामंडळाकडे (पीएमपी) १ हजार १०० बसची मागणी केली आहे. त्यानुसार पीएमपी बसचे नियोजन करत आहे.लोकसभा, विधानसभा, महापालिकेच्या मतदानासाठी पीएमपीकडून मतपेट्या वाहून नेण्यासाठी बससेवा पुरविण्यात येते. त्यासाठी निवडणूक नियोजन अधिकारी मतदार केंद्रानुसार पीएमपीकडे किती बस लागतील, याची माहिती देतात. त्यानुसार पीएमपी मतपेट्या वाहून नेण्यासाठी बस पुरविते यावेळी पुणे, पिंपरी-चिंचवडमध्ये एकाच दिवशी मतदान आहे. निवडणूक आयोगाने पुण्यासाठी ७०० आणि पिंपरी चिंचवडसाठी ४०० बसची मागणी केली आहे. त्या दृष्टीने पीएमपीकडून नियोजन करण्यास सुरुवात केली आहे. पीएमपी बस मतदानाच्या अगोदरच्या दिवशी सकाळी मतपेट्या नेण्यासाठी मुख्य केंद्रावर जातील. तेथून मतपेट्या मतकेंद्रावर जातील. दुसऱ्या दिवशी मतदान संपायच्या अगोदर एक तास आधी पुन्हा बस मतपेट्या गोळा करण्यासाठी केंद्रावर जातील. एखादी बस बंद पडली, तर त्यासाठी राखीव बसचे नियोजन केल्याची माहिती पीएमपी अधिकाऱ्यांनी दिली.
