PMC Ward Committee – महापालिकेच्या प्रभाग समिती अध्यक्षपदासाठी भाजपने आपले उमेदवार जाहीर केले आहेत. सभागृहात महिलांची संख्या जशी जास्त आहे, तसेच मिनी महापालिका अशी ओळख असलेल्या क्षेत्रीय कार्यालयांमध्येही महिलाराज येणार असल्याचे दिसते. या निवडणुकीत भाजपने बहुतांश ठिकाणी महिलांना संधी दिली आहे. भाजपने नगर रोड- वाघोलीसाठी अनिल सातव, येरवडा- वडगावशेरीसाठी कविता गलांडे, शिवाजीनगर-घोले रोडसाठी अमृता म्हेत्रे, औंध- बाणेरसाठी रोहिणी चिमटे, कोथरूड- बावधनसाठी वासंती जाधव, वारजे-कर्वेनगरसाठी मंजुश्री खर्डेकर, सिंहगड रोडसाठी सचिन मोरे, धनकवडी-कात्रज-आंबेगावसाठी प्रतिभा चोरगे, कोंढवा-उंड्रीसाठी रंजना टिळेकर, हडपसर-मांजरीसाठी प्रशांत ऊर्फ मामा तुपे, बिबवेवाडीसाठी मनीषा चोरबेले, कसबा पेठेसाठी उज्वला यादव आणि विश्रामबागवाडा क्षेत्रासाठी राघवेंद्र मानकर यांना उमेदवारी दिली आहे. दरम्यान, ढोले पाटील रोड क्षेत्रीय कार्यालय राष्ट्रवादी काँग्रेस (अजित पवार) ला दिला असून, तेथे पक्षाने सुरेखा कवडे यांना संधी दिली आहे. वानवडी क्षेत्रासाठी अद्याप उमेदवार जाहीर केलेला नाही. काँग्रेसचे तीन अर्ज काँग्रेसने येरवडा कार्यालयासाठी विशाल मलके, वानवडीसाठी साहिल केदारी, तर वैशाली भालेराव यांचा ढोले पाटील रोड क्षेत्रीय कार्यालयासाठी अर्ज दाखल केला आहे. वानवडीसाठी भाजप, राष्ट्रवादीने अर्जच दाखल केला नाही. त्यामुळे ही जागा काँग्रेसला मिळणार असल्याचे स्पष्ट झाले. इतर दोन ठिकाणी अर्ज असल्याने भाजप, राष्ट्रवादीकडून माघारीसाठी काँग्रेसची मनधरणी केली जाईल. मोठ्या प्रभागांत विभागीय उपकेंद्र प्रभाग समितीसाठी १५ पैकी १४ ठिकाणी अर्ज दाखल केले आहेत. भाजप, राष्ट्रवादीने संयुक्तपणे नामांकन सादर केले. मोठ्या भौगोलिक प्रभागांमध्ये विभागीय उपकेंद्र स्थापन करण्याच्या सूचना दिल्या आहेत. खडकवासला, वाघोली आणि सिंहगड रोड येथे याची व्यवहार्यता तपासणी सुरू असून, हे काम लवकरच सुरू करण्यात येणार असल्याचे सभागृह नेते गणेश बिडकर यांनी सांगितले.
